Аҟәа, Москва Аҩны аҿы Владислав Арӡынба 80 шықәса ихыҵра иазку Сергеи Лидов ифотоҭыхымҭақәа рцәыргақәҵа аатит. Уаҟа иаарԥшуп аурыс фотоҭыхҩы шықәсырацәала иҭихуаз афотосахьақәа 19 – Владислав Арӡынба иҩны, иԥсшьараамҭазы, иусураҿы. Сергеи Лидов иҳәеит, ацәыргақәҵа аартра агәырӷьареи алахьеиқәреи шизцәырнаго, "избанзар, иара Аԥсны ахада ҳәа мацара акәымкәа сара дысҩызан, даараӡа иҟәышыз уаҩын, зеиԥш дыҟам иакәын". Иааидкыланы зынӡа Лидов раԥхьатәи ахада ифотосахьақәа 200 раҟара ҭихит. Аԥсны ажурналистцәа Реидгыла ахантәаҩы Руслан Ҳашыг иажәақәа рыла, Аԥсны иадҳәалоу иусумҭақәа зегьы акультура аминистрра иаҭахоит.
Мгәыӡырхәа ақыҭан аԥшатлакә аԥхасҭа знаҭаз ашкол 60 метр ԥшьыркца иҟаз ахыб еиҭашьақәыргылан. Абри атәы лҳәеит ашкол адиректор Марта Џьыкырԥҳа, арадио Sputnik аинтервиу аҭо. Џьыкырԥҳа лажәақәа рыла, аусурақәа ҩымш рыла ихыркәшан, аҵаратә процесс ԥырхага амоуӡеит. "Ашкол ахыб ԥсахуп, аха ақәа аԥхасҭа знаҭыз ауадақәа реиҭашьақәыргылара уажәазы иуадаҩхоит, избанзар, аҵарашықәс хыркәшатәуп — аҵыхәтәантәи аҵәҵәабжьи аԥышәарақәеи мҩаԥгатәуп, убри аҟынтә иааиуа аҵарашықәс азы ҳҽазыҟаҳҵоит, аусурақәа уаанӡа инаҳагӡоит", — лҳәеит Џьыкырԥҳа. Сынтәа Мгәыӡырхәатәи абжьаратә школ иалгоит фҩык аҵаҩцәа.
2025 шықәса рашәара 30 инаркны аҳәаанырцәтәи атәылауаа Урыстәыла аҵакыра ралалара хымш шагу Аҳәынҭқарратә маҵзурақәа рҿы рхы ҭарҩыр акәхоит, иара убасгьы QR-код роур ахәҭоуп ҳәа адырра ҟарҵоит Урыстәыла Аиҳабыра. Асистема авиза змам аҳәаанырцәтәи ауааԥсыреи ЕАЕС атәылақәа ртәылауаагьы уахь иналаҵаны, уахь иалаӡам — Беларусь атәылауаа. Ари аус амиграциа ахылаԥшра арӷәӷәара иазырхоуп. Урыстәыла визала иалало, аамҭалатәи анхареи мамзаргьы анхараз азини змоу, иара убас фышықәсанӡа зхыҵуа ахәыҷқәа арахь иаҵанакӡом.
Асоветтәии урыстәылатәии ахореограф Иури Григорович иԥсҭазаара далҵит. Иара 98 шықәса ихыҵуан. Григорович — XX ашәышықәсазтәи инарылукааша ахореографцәа дреиуоуп. Иара Атеатр Ду аҟны иқәдыргылоз аклассикатә балетқәа зегьы аредакциа давторуп, иара убас иоригиналу абалетқәа ааба аԥиҵеит.