Аԥснытәи ашколқәа рҟны аҵыхәтәантәи аҵәҵәабжьы геит. Ашколқәа рҿы имҩаԥысуаз аныҳәатә цәаҳәақәа Аҳәынҭқарратә бираҟ ашьҭыхрала иалагон. Ашколхәыҷқәа акәашарақәеи ашәаҳәарақәеи аздырхиеит, традициала — рышәҵатәқәа азеиӷьашьарақәа рықәрыҩуан. Аушьҭымҭацәагьы атәыла анапхгара рыдныҳәалеит. Аҳәынҭқарра Ахада Бадра Гәынба Гәдоуҭатәи актәи ашкол аҿтәи аусмҩаԥгатә далахәын, аушьҭымҭацәа аихьӡара дуқәа рзеиӷьеишьеит, арҵаҩцәа русуразы иҭабуп ҳәа реиҳәеит.
Аҧсны ахада Бадра Гәынба аушьҭымҭацәа ашкол ралгара рыдиныҳәалеит. "Ҳара ҳҳәынҭқарра ҳтәылауаа ҿарацәа ирызгәыдууп, ҳара еснагь адгылара раҳҭоит аҵарадырра, аихаҵгылара, Аԥсадгьыл амаҵ аура рганахьала шәгәазыҳәарақәа рзы", - ҳәа аҳәоит адныҳәалараҿы. Аҳәынҭқарра ахада аушьҭымҭацәа ирзеиӷьеишьеит аԥышәарақәа рыҭираҿы ақәҿиарақәа, рылшарақәа рыгәрагара, аихьӡарақәа.
Аԥсны ахада Бадра Гәынба Гәдоуҭатәи актәи ашкол аҟны имҩаԥысуаз аҵыхәтәантәи аҵәҵәабжьы ихы алаирхәит. Иара, аушьҭымҭацәа ашкол ралгара рыдиныҳәалеит, ирзеиӷьеишьеит ақәҿиарақәа. "Ҳаҭыр зқәу аҵаҩцәа, иахьа шәара иреиӷьу аамҭа шәықәынхоит. Шәҵарашықәсқәа наунагӡа шәгәаҵаҿы иаанхоит", — ҳәа инаҵшьны иазгәеиҭеит аҳәынҭқарра ахада. Иара убасгьы атәыла ахада арҵаҩцәа иҭабуп ҳәа реиҳәеит еиҵагыло абиԥарақәа ирыдырҵо аџьабаазы.
2025 шықәсазы Аԥсны атәанчахәытә фонд абиуџьет ахь иахыԥхьаӡалахар ҟалоит 1,8 миллиард мааҭ инареиҳаны, абри атәы иҳәеит арадио Sputnik аинтервиу азҭаз афонд анапхгаҩы Денис Гәылариа. Афонд атәанчаҩцәа рҿаԥхьа ауал амаӡам, ашәарақәа зегьы ишазԥхьагәаҭоу еиԥш имҩаԥысуеит иҳәеит иара. Денис Гәылариа иажәақәа рыла, аиҿкаарақәа афонд аҿаԥхьа ирымоу ауал 580 миллион мааҭ артәоит.