Аԥсны ахада Бадра Гәынбеи Урыстәыла аԥыза-министр ихаҭыԥуаҩ Александр Новаки Кавказтәи аинвестициатә форум аҳәаақәа ирҭагӡаны имҩаԥысыз аиԥылараҿы аԥсуа-аурыс усеицура иадҳәалоу азҵаарақәа жәпакы ирылацәажәеит. Аԥсны ахада напхгара зиҭо аԥсуа делегациа Кавказтәи аинвестициатә форум ахы аланархәуеит. Ареспублика аԥснытәи аарыхыҩцәа раалыҵқәа зну астенди Аҟәатәи аҳаирбаӷәаза аиҭашьақәыргыларазы аинвестициатә проекти днардыруеит.
Кавказтәи аинвестициатә форум аҿы сынтәа аԥсуа ааглыхыҩцәа раалыҵқәеи Аҟәатәи аҳаирбаӷәаза аиҭашьақәыргылара иазку аинвестициатә проекти цәыргақәҵахоит ҳәа иҳәеит Аԥсны аекономика аминистр Ҭеимураз Амқәаб. "Зегьы азҵаарақәа ҳарҭарц иааиуеит, иџьаршьоит аҳаирбаӷәаза аиҿкаашьа. Даара иргәаԥхоит амшын ааигәара, аҳаирплан мамзаргьы атрансферқәа ианырзыԥшу амшын аԥшаҳәаҿы аԥсшьара ахьалшо", — ҳәа азгәеиҭеит Амқәаб.
РУСДРАМ Санкт-Петербург имҩаԥысраны иҟоу афестиваль "Аҿар. Атеатр. Фест" ахы аланархәуеит. Аԥснытәи артистцәа лаҵара 27 рзы Брианцев ихьӡ зху аҿар ртеатр асценаҿы ихәмаруеит аспектакль "Акокаини сареи ҳроман". Афишаҿ иара иарбоуп "Аҷкәын иазгәаҭақәа" ҳәа. Афестиваль 26 шықәса раахыс имаԥсуеит аҩадатәи аҳҭнықалақь аҿы. Уи Европа, Азиа, Африка, Латынтәи Америка рҟынтәи 10-театрк алахәуп.
Аҟәа Аҳабла ҿыц аҩнеихагыла аҭӡы аҟны аҵыхәтәантәи амурал хыркәшоуп. Асахьа автор — асахьаҭыхҩы Шози, уи шьаҭас иаиуит Аҟәа асахьа зныз ажәытә асоветтә ашәҟәаарт. "Хәҭацыԥхьаӡа, акрызҵазкуа ак угәаланаршәоит: аԥсабара, ақалақь, араҟа инхо ауаа. Ари аҭӡы асахьа ацәаныррақәа ирызкуп. Аҟәа иазкуп, уи ыҟан, иҟоуп. Иԥшӡоуп. Иԥхоуп. Иҟаҵәҟьоуп", — ҳәа аанацҳауеит апроект "Аформа ҿыцқәа" Telegram-канал аҿы.