Аԥсны мрагыларатәи ахәҭаҿы аҭыԥ ԥшӡарақәа ыҟоуп атуристцәа ргара ахьеиҿкаатәу ҳәа азгәеиҭеит атуризм аминистр Асҭамыр Логәуа. Иара иажәақәа рыла, раԥхьа "Илакәтәу мрагыларатәи Аԥсны" ахырхарҭала Кындыӷ, Тҟәарчал, Отаԥтәи аҳаԥы рыла аныҟәарақәа рышьақәыргылара азгәаҭан, аха аҭыԥ ԥшӡарақәа рхыԥхьаӡара иацлар алшоит, дара аиҳарак аҭыԥантәи ауааԥсыра ирыдыргалоит."Иаҳҳәап, Маркәыла ақыҭа ахаҭарнакцәа исарҳәеит, ажәытәӡатәи аныхабаа рыцқьаны асасцәа аҭаан ирбартә ишыҟарҵаз", — ҳәа азгәеиҭеит Асҭамыр Логәуа. Иара аҳаирбаӷәаза аартра атуристтә индустриа аҿиара иацхраауеит ҳәа агәыӷра шимоу иҳәеит.
Аҳабла ҿыц аҿы иҟоу апарк аиӷьтәраз аусурақәа акурорттә аамҭа ашьҭахь ихацыркхоит ҳәа арадио Sputnik аефир аҿы еиҭеиҳәеит Аҟәа ахада ихаҭыԥуаҩ Асҭамыр Ашәба. Иара иазгәеиҭеит аиҿцәажәарақәа иҳаҩсыз ашықәс аахыс ишырҿыз, апроект адгалара шымҩаԥысхьоу. "Азҵаара ҳаӡбахьеит, апарк аиӷьтәразы аусурақәа аԥхынтәи аԥсшьарақәа ашьҭахь ихацыркхоит. Ҳара гәык-ԥсык ала иҭабуп ҳәа ҳҳәоит, избанзар макьана даҽа шықәсқәак ҳхала ари азҵаара аӡбара ҳалшо ҳаҟамызт", — ҳәа инаҵшьны иазгәеиҭеит Ашәба.
Аԥсны Аҵара аминистр Хана Гәынԥҳа Нелли Аӡынба лыхьӡ зху Апедагогикатә институт даҭааит. Аминистри аинститут аколлективи реиԥылараан ҷыдала хшыҩзышьҭра аҭан еиуеиԥшым аҵарадырратә платформақәа рыҿиареи арҵаҩцәа рҵарадырра аиӷьтәреи, аспециалистцәа ҿарацәа рыцхыраара иазырхоу ауснагӡатәқәеи уҳәа ҳаамҭазтәи аҵарадырра азҵаарақәа ирылацәажәеит ҳәа аанацҳауеит аусбарҭа апресс-маҵзура.
Аҟәа Аҳабла ҿыц ахь ахаҵәирҭаҿы игылоу асветофор дырҿыцуеит ҳәа Sputnik адырра аиҭеит Аԥсны Аҳәынҭқарратә автоинспекциа аиҳабы Дамеи Аҩӡба. Уажәы амҩеихдаҿы ишьақәыргылоу ашьаҟауаа рзы асветофор аус ауӡом. Аҩӡба иазгәеиҭеит уажәы уи аусура аларгара шалымшо, амашьынарныҟәцаҩцәа мҩахымҟьарц азы, убри аҟнытә шьапыла ииасуа ауаа амашьынақәа рзы асветофор адыргақәа рылоуп ииаслар шакәу. Аиқәыршәагақәа рзы аҿаҵа ҟарҵахьеит, аусурақәа мызкы иалагӡаны ихыркәшахоит.