Аԥсны ахада Бадра Гәынба Владимир Путини ижәлари Урыстәыла Амш рыдиныҳәалеит. Уи инаҵшьны иазгәеиҭеит, Аԥсназы Урыстәыла иахьстратегиатә партниору адагьы, узықәгәыӷыртә иҟоу аҩыза иаша шакәу."Ҳара ахә ҳаракны иаҳшьоит Урыстәыла ҳауаажәлар рышьақәгылареи рыҿиареи аус аҿы иҟарҵо адгылара. Аҳаҭырқәҵареи агәреибагареи шьаҭас измоу ҳаизыҟазаашьақәа ҳтәылақәа ринтересқәа рзы аҭынчреи аҭышәынтәалареи рҟны ихадоуп", — ҳәа инаҵшьны иазгәеиҭеит Гәынба.
Аԥсны атуризм аминистр Асҭамыр Логәуеи аекономикатә ҿиара аминистр ихаҭыԥуаҩ Дмитри Вахрукови русеицуразы азҵаарақәа ирылацәажәеит. Аиԥылараҿы Аԥсны атуризм адгылара азҵаарақәеи, аинфраструктура аԥҵареи аҿиареи, агротуризми ашьхатә туризми рыҿиареи, аобиект ҿыцқәа – аквапарки аглампингқәеи раартра ирылацәажәеит. Иара убас иззаҭгылаз зҵаароуп ДЖәР-нтәи Аԥсныҟа атуристтә дәыӷба абжьаҵара, уи аан Аҟәа аанҿасырҭа "Кьалашәыр" аҟны иаангыларц, абри атәы аанацҳауеит Атуризм аминистрра.
Аԥсуа драматә театр афоие аҿы Урыстәыла амш иазкны Аԥсны Аҳәынҭқарратә камертә оркестр аконцерт мҩаԥнагеит. Аоркестри Аҳәынҭқарратә филармониа асолистцәа Алхас Ферзбеи, Нана Черқьезиаԥҳаи, Елена Ҳагԥҳаи инарыгӡеит Рахманинов, Артемиев, Чаиковски, Римски-Корсаков, Руттер, Косма раԥҵамҭақәа, иара убас еицырдыруа аоперақәа рҟынтәи аромансқәеи ариақәеи. Аконцерт еиҿнакааит Аҟәа иҟоу Москва Аҩны.
Гәдоуҭа ақалақь агәҭаны ацхыраара лас злахәыз амҩатә машәыр аҟны хҩык ааха роуит ҳәа Sputnik иазеиҭеиҳәеит араион амилициа аҟәша аиҳабы Зосма Гыцба. Иара иазгәеиҭеит, амашәыр шыҟалаз Афырхацәа рпроспект ала асветофор аҟны. Ацхыраара лас аныҟәцаҩи, афельдшари, урҭ иргоз ачымазҩи аахақәа рыманы ахәшәтәырҭахь инаргеит. Амашьына лас аныҟәцаҩ ааха имоуӡеит. Ахҭыс зыхҟьаз аилкаара мҩаԥысуеит. Аҭыԥ аҿы аусеилыргаратә гәыԥ аус ауеит.