2025 шықәса хәымз ирҭагӡаны агәабзиарахьчара ахырхарҭала еиуеиԥшым ауснагӡатәқәа ирзоужьын 330 млн мааҭ, абри атәы иҳәеит Аԥсны аԥыза-министр Владимир Делба атәыла ахада имҩаԥигоз аилатәараҟны.Арҭ аԥарақәа реиҳарак атәылуаа рыхәшәтәреи ахәшәқәа раахәареи ирзырхоуп иҳәеит иара.Аминистрцәа реилазаара аиҳабы иажәақәа рыла, аҳәынҭқарратә программақәа зегьы ишахәҭоу инарыгӡоит, урҭ рахьтә акызаҵәыкгьы акала иагдырхом.Иахьатәи аамҭазы абиуџьеттә усзуҩцәа руалафахәы инагӡаны ирыҭоуп.
2025 шықәсазы Гагра араион ауааԥсыра рынхарҭатә ҭагылазаашьақәа реиӷьтәразы 11,5 млн мааҭ азоужьын.Гагра араион абиуџьет ҳазҭоу ашықәс азы ахашәалахәы — 1,1 миллиард мааҭ ыҟоуп, асубсидиақәа – 65 млн, ахарџьқәа 2 млрд рҟынӡа инаӡоит, абарҭ арбагакәа ртәы атәыла ахада Бадра Гәынба изеиҭеиҳәеит араион ахада Иури Хагәышь.Иара иажәақәа рыла, араион аҟны ауааԥсыра афинанстә цхыраара рыҭаразы апрограмма азгәаҭоуп. Уи аҳәаақәа ирҭагӡаны 2025 шықәсазы 14 млн мааҭ азоурышьҭхьеит.
Иахьа Урыстәыла аҩадатәи аҳҭнықалақь аҿы аусура иалагеит Петербургтәи жәларбжьаратәи аекономикатә форум 20 нызқьҩык инареиҳаны 140 тәыла, Евразиатәи аекономикатә еидгыла, Ихьыԥшым атәылақәа реидгыла, БРИКС, АСЕАН, Африка, Мрагылара Ааигәа, Латинтәи Америка уҳәа ртәылақәа уахь иналаҵаны, рхаҭарнакцәа аусмҩаԥгатә рхы аладырхәуеит. Апрограммаҿы иҟоуп 150 инареиҳаны аусмҩаԥгатәқәа. Рашәарамза 20 рзы апленартә еилатәараан дықәгылоит Урыстәыла ахада Владимир Путин.
Аԥсны инхо Урыстәыла атәылауаҩра змоу атәанчаҩцәа атәанчахәы роулоит акарта ПСБ ахь мацара, абри атәы аанацҳауеит абанк апресс-маҵзура.Атәанчахәқәа ПСБ акартақәа рахь мацара ахыԥхьаӡалара аԥҟарақәа рҽырыԥсахуеит нанҳәамза инаркны.Иааиԥмырҟьаӡакәа Аԥсны инхо атәанчаҩцәа ПСБ акарта аиуразы заанаҵы иманшәалоу аамҭа алхны рыҽҭарҩыр рылшоит, хәыда-ԥсадатәи аҭел ала. Иара убас ареспублика иахьаҵанакуа иаарту Аԥсны Аҵәахбанк аҟәшақәа 12 иадҵаалар рылшоит. Иахьыҟоу аҭыӡҭыԥқәа ахсаалаҿы иарбоуп.Зныҟәара ԥку атәылауаа рахь агәыԥ ҷыда есыҽны акартақәа рызнаргоит, амҽыша ада.
Афон ҿыц Абетонтә маакырақәа амашьына рысны иарбгеит.Амҩатә машәыр аҟны аӡәгьы ааха имоуӡеит ҳәа Sputnik иазеиҭеиҳәеит Гәдоуҭа араион амилициа аҟәша аиҳабы Зосма Гыцба.Амашьынарныҟәцаҩ иажәақәа рыла, егьи ацәаҳәала иааиуаз амашьына имҩа ианылеит, еиҿамсырц азы иара ихы ацәигеит.Аҭыԥахь инеит Аҳәынҭавтоинспекциа аусзуҩцәа, дара ахҭыс азы аԥқаанҵа шьақәдыргылеит. Арныҟәцаҩ арыжәтә ыжәны дыҟамызт, ихатә харџь ала амаакырақәа шьақәиргылоит