Аԥсны ахада Бадра Гәынба Санкт-Петербург инхо аԥсуа диаспора рхаҭарнакцәа дырԥылеит. Аиԥылараҿы ирылацәажәеит аԥсуа бызшәа аҿиареи, амилаҭтә культуреи, аекономикеи, аҿар рполитикеи рызҵаарақәа ҳәа аанацҳауеит Аԥсны ахада ипресс-маҵзура. "Ҳара ҳзы аԥыжәара аманы иҟоуп азинеиҿкаара ашьақәыргылара, аекономика аҿиара, Урыстәылатәи Афедерациеи ҳареи ҳаизыҟазаашьақәа рырҭбаара, иара убас агәабзиарахьчареи, аҵареи, аспорти рырӷәӷәара. Арҭ азҵаарақәа рыӡбароуп атәыла анапхгара ҿыц ирхықәкы хаданы иҟоу", — иҳәеит атәыла ахада.
Афорум "Аԥсны амаршрутқәа" мҩаԥысуеит Ҟрым, рашәара 22 инаркны 28 рҟынӡа ҳәа Sputnik иазеиҭеиҳәеит аспорт азы Аҳәынҭеилакы аҿар рыҟәша аиҳабы Беслан Аршба. Аусмҩаԥгатә рхы аладырхәуеит 70-ҩык Аԥсны атуризм аусхк иаҵанакуа азанааҭдырҩцәеи аекспертцәеи. Афорум аҿы ибеиоу аҵаратәи апрактикатәи программа еиҿкаахоит: акреативтә индустриа аҟынтәи аспециалистцәа аҟазара-классқәа, атуризми акультуреи рыҿиаразы апроектқәа ирызку аусмҩаԥгатәқәа еиҿыркаауеит, иара убасгьы аимадарақәа рзы алшарақәа аԥырҵоит.
Аԥсни Урыстәылеи акультура ахырхарҭала 2026-2028 ашықәсқәа рзы аусбарҭабжьаратәи аусеицуратә программа рнапы аҵарҩуеит. Имҩаԥысит Аԥсны акультура аминистр Даур Ақаҩбеи Урыстәыла акультура аминистр ихаҭыԥуаҩ Андреи Малышеви реиԥылара.Аусшәҟәы анапаҵаҩра азԥхьагәаҭоуп Санкт-Петербургтәи еидҵоу акультурақәа Жәларбжьаратәи рфорум аҳәаақәа ирҭагӡаны. Иара убас, аганқәа ирылацәажәеит ҟазара аганахьала аусеицура аҿиареи агастрольтә усмҩаԥгатәқәеи ирызкыз азҵаарақәа.
КВН акоманда "Аԥснытәи Нарҭаа" ақәгылара рҽазыҟарҵоит. Иахьа дара иреиҳаӡоу алига акоманда "Четыре татарина", еизгоу МАИ еицны КВН аушьҭымҭацәа реиԥылара рхы аладырхәуеит Екатеринбург. Ашоу мҩаԥигоит Валдис Пельш, аӡбаҩцәа рхыԥхьаӡараҿ иҟоуп Сергеи Светлакови акосмонавт Олег Новицкии. Ашоу ателеверсиа Актәи аканал аҿы идырбахоит.