Аԥсны адәныҟатәи аусқәа рминистр Олег Барцыц Шьамтәыла иҟоу Аԥсны ацҳаражәҳәаҩ Муҳаммад Али диԥылеит. Аминистр ацҳаражәҳәарҭа аусура атәы изеиҭарҳәеит. Барцыц инаҵшьны иазгәеиҭеит Аԥсни Шьамтәылеи реизыҟазаашьақәа рырҿиареи рырӷәӷәареи рзы адипломатиатә хаҭарнакра аусура аҵак ду шамоу.
Қырҭтәылеи НАТО-и реизааигәахара Қарҭ Аԥсни Аахыҵ Уаԥстәылеи рҿаԥхьа амч ахамырхәараз ахәдықәҵара аднаҵоит ҳәа аҳәамҭа ҟарҵеит Урыстәыла адәныҟатәи аусқәа рминистрраҿы Женеватәи аиҿцәажәарақәа 64-тәи рраунд ашьҭахь. Ахәдықәҵара еиҿкаатәуп азакәантә ҭакԥхықәра шьақәзырӷәӷәо аиқәшаҳаҭра аҳасаб ала. “Абарҭ аусмҩаԥгатәқәа ццакрыла рыдкылара ахәҭаны иҟоуп Қырҭтәыла уаанӡатәи арегионқәа рганахь ала арратә мчқәа ахы иархәаны анапахь раагаразы иҟоу ашәарҭарақәеи иара убасгьы Қырҭтәылеи НАТО-и реизааигәахара иахьацырҵои, уи ус шакәу шьақәнарӷәӷәоит Аҩадатлантикатә блок арра-ҽазыҟаҵаратә усмҩаԥгатәқәа реиԥш иҟоу ақырҭуа гани алианси ирыбжьоу аимадара" — ҳәа азгәарҭеит Урыстәыла АдәАР аҟны.
Аҟәа иҟоу ахәыҷтәы кризистә центр аус ацуреи ацхыраара аҭареи ирылацәажәеит Атәыла аиҳабыра алахәылацәа. Аԥыза-министр ихаҭыԥуаҩ Вараздат Миносиан, аҵара аминистр Хана Гәынԥҳа, асоциалтә еиқәыршәара аминистр Руслан Аџьба аусбарҭа аусура шеиҿкаау еилыркааит, ахәыҷқәеи аусзуҩцәеи ирыҿцәажәеит, ацентр ахыбра аҭагылазаашьа гәарҭеит. 2025 шықәса цәыббрамзанӡа ацентр ахарџьқәа шәахоит аҳәынҭқарратә биуџьет аҟынтәи.
Аҳәынҭқарратә ҳазалхратә еилакы аусзуҩцәа Афон ҿыц 73 електронтә сигарет ԥшааны ирымырхит ҳәа аанацҳауеит аусбарҭа апресс-маҵзура. Агәаҭарақәа раан иаарԥшын: акцизтә дыргақәа зқәымыз 50 ҭоԥ арԥхаратә стикқәа Heets. Иаанкылаз атауар аџьармыкьатә хәԥса — 94 500 мааҭ ыҟоуп. Аматериалқәа аҳазалхратә ҭҵаарақәа рыҟәшахьы идәықәҵоуп.