Аԥсны аенергетика аминистр Баҭал Мышәбеи урыстәылатәи аҟазацәеи еицны Гал араион аҿы иҟоу аӡхыҽҽатә фымцастанциақәа ҭырҵааит ҳәа аанацҳауеит апресс-маҵзура. Аилахәыра "РусГидро" аекспертцәа амаҭәахәқәеи абетонтә еиҿартәышьақәеи рҭагылазаашьа инарҵауланы игәарҭоит, иара убасгьы – аргыларақәа ргидротехникатә, ргеофизикатә, ргеологиатә ҷыдарақәа ҭырҵаауеит. Агәаҭаратә усмҩаԥгатәқәа ирылахәуп "Амшынеиқәафымцамч" аусзуҩцәагьы. Уи урыстәылатәи рколлегацәа рҟынтәи апрактикатәи атеориатәи адыррақәа роуртә алшара ҟанаҵоит.
Атуризм аминистрреи Ашәахтәқәеи аизгақәеи рминистрреи анапхгаҩцәа Асҭамыр Логәуеи Едгар Бениеи Аԥсныҟа аекскурсиатә пакетқәа рцифраркразы азҵаара иалацәажәеит. Ихадоу аилацәажәаратә темақәа иреиуан атуроператорцәа рзы аекскурсиатә путиевкақәа ашәҟәҭагалареи аелектронтә формат ахь аиасреи. Аминистрцәа анхарҭатә ҭыԥқәеи аекскурсиатә еиҿкаарақәеи рзы еицырзеиԥшу аҭыԥқәа рҿы агәаҭарақәеи аҳасабырба аҟаҵареи рзы аплан иахәаԥшит.
Таврида иҟоу аҟазаратә школ "Аԥсны амаршрутқәа" аҳәаақәа ирҭагӡаны алекциа "Пицундатәи акурорт: иацы, иахьа, уаҵәы" мҩаԥызгеит, азҿлымҳарагьы аман, астудентцәеи сареи азҵаарақәа еимаҳдеит иҳәеит арадио Sputnik аҟны аметодист, актәи акатегориа змоу аекскурсиамҩаԥгаҩ Форд Чычба. Чычба иажәақәа рыла, рколлегацәеи дареи русеицура даара иманшәалоуп.
Аҟәатәи аҳаирбаӷәаза аушьҭырҭатә ҳаиртә ҭыԥ аштаттә усура инақәыршәаны аус ауеит ҳәа иҳәеит Sputnik аинтервиу азҭаз Аԥсны Аҳәынҭқарратә шәарҭадаратә маҵзура аҳәаахьчаратә усбарҭа аиҳабы Русҭам Латипов. "Ари аргылара акыр зҵазкуаа транспорттә баӷәазоуп, Аԥсны атәылауааи аҳәаанырцәуааи ара ауп ихьааиуа, арантәи ауп ишцогьы", — ҳәа азгәеиҭеит иара. Агәаҭара-аушьҭырҭатә ҭыԥ аҿы амаҵзуратә усмҩаԥгатәқәа реиҿкаара аханатә аиҭашьақәыргыларатәи аргыларатәи усурақәа ирыцны имҩаԥысуан. Урыстәылеи Урыстәыла АШәМ Аҳәаахьчаратә усбарҭеи Аԥсни ирыбжьарҵаз аҳәынҭқаррабжьаратә еиқәшаҳаҭрақәа инарықәыршәаны аушьҭырҭатә ҭыԥ Аҳәаақәҵаратә хеилак аԥҵан.