32 шықәса раԥхьа, ԥхынгәы 2 1993 шықәсазы аԥсуа десант Очамчыра араион Тамшь ақыҭан иӡхыҵит. Аибашьцәа рҿаԥхьа хықәкыс иқәгылан амҩаду хада аанкылара, ақырҭуа архәҭақәа ацхыраараз Аҟәаҟа раамышьҭра. Убри аан аӷа ааха ирҭар акәын аҩада-мраҭашәаратәи афронт ацәаҳәала. Ииультәи ажәылара Аԥсны жәлар Рџьынџьтәылатә еибашьра алҵшәа зыӡбаз акәхеит. Акымкәа иманшәаламхаз аоперациақәа рышьҭахь, аԥсуа архәҭақәа даҽазнык ижәылеит ақырҭқәа ирымпыҵархалаз адгьылқәа рхақәиҭтәразы. Ари ажәылараҿы иҭахеит 60-ҩык аԥсуа еибашьцәа.
Тамшьтәи адесант аныӡхыҵыз иҭахаз аибашьцәа ргәаладыршәеит Аԥсны. иАбаҟа аҿаԥхьа ашәҭқәа шьҭарҵеит атәыла ахада Бадра Гәынба, уи ихаҭыԥуаҩ Беслан Бигәаа, ахада иусбарҭа ахантәаҩы Беслан Ешба, адепутатцәа, аминистрцәа реилазаара алахәылацәа, аветеранцәа ҳәа аанацҳауеит "Аԥсныпресс".
Рашәарамзазы Аԥсны аҳазалхратә шәатәқәа рхыԥхьаӡара 436,6 миллион мааҭ ҟалеит, ари ашықәсазы ирекордтәуп ҳәа аанацҳауеит Аҳәынҭқарра аҳазалхратә еилакы. 2024 шықәсазы абри аамҭазы еизган 390 миллион мааҭ инареиҳаны. Иааизакны ашықәс актәи азбжазы абиуџьет иахыԥхьаӡалоуп 2 миллиардки 130,3 миллион мааҭ. Иҳаҩсыз ашықәс иаҿырԥшны аизҳара 206 миллион ҟалеит.
Сынтәа Аԥсны 8-нызқь тонна рҟынӡа акарпыжә аҽаҩра аиура иазыԥшуп. Амшцәгьақәа ирыхҟьаны, аҭыԥантәи акарпыжәқәа абжьааԥны аасҭа ихьшәаны аџьармыкьаҿы ицәырҵит ҳәа арадио Sputnik аефир аҿы иҳәеит аминистрра агроном хада Ҭеваз Ачба. Иара инаҵшьны иазгәеиҭеит, ҳазҭоу ашықәс азы ареспубликахь ишааргахьоу 13,5 тонна акарпыжә. Убри аан, аусбарҭа амаҵзурақәа 240 кьыла рҟынӡа аҳәаанырцәынтәи иааргаз акарпыжә ҽеим ҳәа азгәарҭахьеит. Изыхҟьазгьы анитратқәа рыҳаракра ауп.