Аҧсны ахада Бадра Гәынба Аҭагылазаашьа ҷыдақәа рминистрра аусзуҩцәа рзанааҭтә ныҳәа рыдиныҳәалеит."Шәара шәус шәазыхиареи, шәгәымшәареи, шәусура гәык-ԥсык ала шәазыҟазаареи Аԥсны атәылауаа зегьы ҳаҭыр ақәырҵоит, ҭабуп ҳәа ахырҳәаауеит", - ҳәа аҳәоит атекст аҿы.
Аԥснытәи Аҳәынҭқарратә университет аҭалараз ашәҟәқәа рыдкылара иалагеит .Адокументқәа рыдыркылоит ԥхынгәы 12 рҟынӡа. Сынтәа 1041 ҭыԥ шьақәырӷәӷәоуп — абиуџьеттә 387, аҵараҵаразы зыхә шәатәу — 674, абри атәы иҳәеит адкыларатә комиссиа аҭакзыԥхықәу амаӡаныҟәгаҩ Адгәыр Какоба. Аолимпиада "Аҳаракырахь амҩа" аихшьаалақәа рыла 142-ы аушьҭымҭацәа аҵариуарҭа рахыԥхьаӡалараз ажәалагала ҟаҵоуп.Какоба изагәеиҭеит реиҳа иалыркаауа ахырхарҭақәа ишреиуоу "атуризм", "азиндырра", "аекономика".Аматематика, афизика, ахимиа азанааҭқәа алызхуа рхыԥхьаӡара еиҵоуп иҳәеит иара.
Аҟәа ақалақь аҿы закәаншьаҭада иқәыргылаз аӡыргаратә ӷәқәа ықәыргеит.Аҳҭнықалақь ахадара аусзуҩцәа зинда иқәыргылаз аӡыргаратә ӷәқәа ааба ықәыргеит ҳәа аанацҳауеит апресс-маҵзура.Аҳҭнықалақь ахадара ахаҭарнак Инал Абыхәба ишазгәеиҭаз ала, "Аӡыргаразы" азакәан инақәыршәаны, акәыршақәа, ашьаҟауаа рныҟәарҭақәа, иара убас аныҟәареи арыцқьареи иахьырԥырхагоу аҭыԥқәа рҿы аӡыргаратә ӷәқәа рышьақәыргылара ҟалом.Зинда ашьақәыргылара, аӡыргараз ашәахтә амшәара ма аԥсуа бызшәада аӡыргара аларҵәара аан арҭ аҭагылазаашьақәа еилазго ахараԥса рықәырҵоит
Аԥснытәи Аҳәынҭқарратә университет астудентцәа IX Жәларбжьаратәи аԥхьаҩцәа реицлабра "Полиязычный Пушкин" аԥхьахәқәа ргеит.Лонда Ҳагәышьԥҳа, Милена Депелиан, Асҭанда Доӷәызԥҳа актәи аҩаӡара змоу адипломқәа роуит. Урҭ урысшәала Пушкин иҩымҭақәа ирыԥхьеит, иара убасгьы Баграт Шьынқәбеи Таиф Аџьбеи аԥсышәалатәи реиҭагамҭақәа, Ваган Хукасиан аерман бызшәахь еиҭеигаз аҩымҭа. Азыҟаҵара напхгара алҭон аурыс бызшәа акафедра арҵаҩы еиҳабы Викториа Кәарҷиаԥҳа, уи аџьшьаратәшәҟәы лнаршьеит.Аицлабра Ҟабарда-Балкариатәи аҳәынҭқарратә университет аҿы 2016 шықәсаахыс имҩаԥысуеит.
Афон ҿыц Аԥсны иқәынхо атәыла аҭааразы ирабжьырго аҭыԥқәа иреиуоуп.Уи дыршаҳатуеит Аԥснытәи Аҳәынҭқарратә университети Москватәи Аҳәынҭқарратә университети рҵарауаа еицымҩаԥыргаз азҵаараҭҵаара алҵшәақәа. Азҵаараҭҵаара иалахәыз рҟынтәи Афон ҿыц азы рыбжьы арҭеит 89,2%, уи иашьҭанеиуеит Лыхнытәи ауахәама — 85,8%, ақьафурҭа "Гагрыԥшь" — 82,5%. Иара убас иалкаау хә-хырхарҭак ирылашәеит — Камантәи ауахәамеи Баӷрыԥсҭа иҟоу Сталин идачеи.Азҵаараҭҵаара мҩаԥган апроект "Аԥсны абыжь-џьашьахәык" аҳәаақәа ирҭагӡаны.