Аԥсны Асоциалтә еиқәыршәара аминистрра Урыстәылантәи асоциалтә цхыраагӡатә шәарақәа ирыдҳәалоу азҵаарақәа рганахь ала атәылауаа рыдкылара мҩаԥнагалоит. Ацхыраагӡашәарақәа рыҭареи рызшәареи рзы аиҳабырабжьаратә комиссиа аилатәараҿы Урыстәыла асоциалтә цхыраара зауа Аԥсны атәылауаа ашьауӷатә ус раҵаркра ашәарҭара иадҳәалоу аҭагылазаашьа аӡбара амҩақәа ирылацәажәеит ҳәа аанацҳауеит "Аԥсныпресс". Ҩганктәи аусеицура аҳәаақәа ирҭагӡаны, аицыӡбарақәеи урыстәылатәи аган аусмҩаԥгатәқәа рыҽрықәыршәареи шхымԥадатәиу азгәаҭан.
Мышкы иалагӡаны хәыҷи-дуи 150-ҩык рҟынӡа ахәшәтәырҭахь иааиуеит норовируси ротавируси змоу ҳәа азгәеиҭеит арадио Sputnik аефир аҟны Аҟәатәи аинфекциатә хәшәтәырҭа аҳақьым Гәдиса Шларба. Аҳақьым иажәақәа рыла, ротавирус аасҭа норовирус змоу рхыԥхьаӡара еиҳауп, насгьы еҳарак изыхьуа ахәыҷқәа роуп. Иара амцашоура 38 рҟынӡа ишьҭыҵуит, амгәа ахьааи аҿыхреи ацуп. Шларба иҳәеит, уахыки-ҽнаки ирылагӡаны ахәшәтәырҭахь иааиуа рҟнытә 5-10-ҩык рҟынӡа шааныркыло, ҩымш-хымш инареиҳангьы ахәшәтәра зҭаххо шыҟоугьы. Иара убас иазгәеиҭеит, есышықәаса аԥхын аамҭазы ироуа ацхыраара аҳәаақәа ирҭагӡаны Москвантәи рколлега дааны дышрыцхраауа.
Аахыҵ Уаԥстәылатәи арежиссиор Тамерлан Ӡудцов икомедиа "Аҳәынҭқар ҟьантаз" ықәдыргылоит Аԥсуа драматә театр аҿы. Ақәыргыламҭа аԥсуа бызшәала акәхоит ҳәа аанацҳауеит Sputnik Аахыҵ Уаԥстәыла. "Ԥхынгәымза анҵәамҭазы аҽазыҟаҵарақәа ҳрылагоит, нанҳәамза анҵәамҭазы аспектакль арбара азырхиара ҳгәы иҭоуп", — иҳәеит Ӡудцов. Иара иажәақәа рыла, аԥсуа ган уаанӡагьы ааԥхьара инаҭахьан, аха усҟан Аахыҵ Уаԥстәыла иусура иалнамыршеит.
Геленџьиктәи аҳаирбаӷәаза хышықәса рышьҭахь Москвантәи раԥхьатәи ареис аднакылоит. Аҳаиреилахәыра "Аэрофлот" аҳаирплан асааҭ 15:25 рзы итәоит, уи 175-ҩык апассаџьырцәа аанагоит ҳәа аанацҳауеит РИА Новости. Ԥхынгәымза алагамҭазы Росавиациа аҳаирбаӷәаза аусура ишеиҭалаго азы адырра ҟанаҵеит. Аҳаирбаӷәаза 2022 шықәсазы иадаркит ашәарҭадаратә мзызқәа инарымаданы.