Адәыӷбаангыларҭа "Гагрыԥшь" аҿы аремонттә усурақәа ирылагеит.Аԥсны жәлар Рџьынџьтәылатә еибашьра еилгеижьҭеи адәыӷбаангыларҭа аус ауӡомызт, аремонт зныкгьы имҩаԥгаӡамызт ҳәа аанацҳауеит Аԥсны аихамҩа.Уажәы уа адгьыл арыцқьара иаҿуп ахаҳәҟьаԥс ашьҭаҵаразы, аиҿкаарақәа мҩаԥысуеит, афымцамҩангагақәа рышьақәыргылара рҽазыҟарҵоит, ахыбгьы еимырххьеит.Аусура афинансқәа азоунажьит Аԥснытәи аихамҩа.
2025 шықәса актәи абжазы Аҟәа ақалақь аҿы амҩатә ԥҟарақәа реилагарақәа 3700 инареиҳаны иаарԥшын.Уи шықәсык аԥхьа иҟаз раасҭа 2938 рыла еиҵоуп ҳәа Аҟәа Ақалақьтә еизара аилатәараҿы иазгәеиҭеит аҩнуҵҟатәи аусқәа Аҟәатәи рыҟәша аиҳабы Асҭамыр Хагәышь.Ари аамҭа иалагӡаны арыжәтә ыжәны амашьына аныҟәцаразы 348 хҭыс ҭаҩын, 284-ҩык ауаа рныҟәцаратә гәраргагақәа рымхын.Аԥҟарақәа реилагаразы ахараԥсақәа ааизакны 4,6 миллион мааҭ ҟалеит ҳәа инаҵшьны иазгәеиҭеит Хагәышь.
Севастополь даанкылоуп аҳәынҭқарра аԥсахразы урыстәылауаҩ.47 шықәса зхыҵуа ахаҵа урыстәылатәи аҳауахьчара аусура иазку адыррақәа украинатәи аԥшыхәратә усбарҭахь Telegram ала инаишьҭуан ҳәа аанацҳауеит Урыстәыла Афедералтә шәарҭадаратә маҵзура.Ашьаус хацыркуп.
XXIII афестиваль "Хьыбла Гьерзмааԥҳа шәаалыԥхьоит..." раԥхьатәи аконцерт хыркәшахеит Аҟәа.Аусмҩаԥгатә ааиртит Урыстәылеи Аԥсни жәлар рартист Евгени Книазев, уи аконцерт ареспублика раԥхьатәи ахада Владислав Арӡынба игәалашәара ишазкыз иҳәеит."Аконцерт Аԥсны аҵеи лаша, атәылауаҩ иаша, апатриот Владислав Арӡынба 80 шықәса ихыҵра, иара убас зыжәлари Зыԥсадгьыл шьала-дала ирыласоу зегьы ирызкуп", — ҳәа.Аопера аеҵәахә асасцәа аԥсшәа раҳәаны, инаҵшьны иазгәалҭеит афестиваль азы лыԥхыӡ ахьлабҿабахаз, абраҟа шакәу уи Владислав Арӡынба иахьидикылаз, дахьадгылаз иабзоураны. Сара ҳаҭыр ду сзақәуп ари ауаҩ ду игәалашәара иазкны XXIII асезон аартра", — лҳәеит Герзмааԥҳа
Аҟәа ақалақь аҿы амемориалтә ӷәы ҿыцқәа ҩба кыдҵахоит .Уи азы аӡбара рыдыркылеит Аҟәа Ақалақьтә еизара адепутатцәа.Аԥсны аҭҵаараддырақәа ракадемиа академик, афилологиатә ҭҵаарадыррақәа рдоктор, ААУ апрофессор, иреиҳаӡоу аҵараиурҭа зҽаԥсазтәыз аусзуҩ, "Ахьӡ-Аԥша" аорден II аҩаӡара занашьоу Маргарита Ладариаԥҳа илызку агәалашәаратә ӷәы Агрба имҩа аҩны 37 аҭӡаҿы икыдҵахоит.Аԥсны Жәлар рпоет, зҽаԥсазтәыз акультура аусзуҩ, "Ахьӡ-Аԥша" аорден III аҩаӡара занашьоу Витали Амаршьан изку агәалашәаратә ӷәы Имам Шамиль имҩа аҩны 6 аҭӡаҿы икыдҵахоит.
Згәабзиара уашәшәыроу ахәыҷқәеи ахәыҷы рацәа змоу аҭаацәа рҟынтәи ахәыҷқәеи Ареспубликатә стадион аҿы имҩаԥысуаз ацирктә қәгылара "Агәымшәақәа реҵәаџьаа" иаҭааит.Ацирк администратор Вера Мешьанова лажәақәа рыла, Аԥсны ахада инапынҵала, иааидкыланы 2200 билеҭ рыҭоуп, уи абзоурала ахәыҷқәа аспектакль хәыда-ԥсада ахәаԥшра рылшоит.