Гәдоуҭатәи Акультура ахан аҿы имҩаԥысит Хатәгәаԥхарала еибашьуаз рымш иазку аныҳәатә еилатәара.Ауснагӡатә рхы аладырхәит Аҳәынҭқарра ахада Бадра Гәынба, аиҳабыра алахәылацәа, хатәгәаԥхарала еибашьуаз, ауаажәларра.Аҳәынҭқарра ахада иазгәеиҭеит, аныҳәа Аԥсны ауааԥсыра рзы иҷыдоу аҵакы шамоуАԥсуа ҳәынҭқарра хатәгәаԥхарала еибашьуази, урҭ рҭаацәеи, рхәыҷқәеи рыцхрааразы иалшо зегьы ҟанаҵалоит. Аԥсны шәаргьы ишәыԥсадгьылуп. Шәара – дарбанзаалак аԥсуа игәы шәаҵанакуеит, шәизааигәоуп", — ҳәа инаҵшьны иазгәеиҭеит Гәынба.Иааидкыланы ҩнызқьҩык инареиҳаны Нхыҵ Кавказ ареспубликақәа, Урыстәыла арегионқәа, Ҭырқәтәыла, Шьамтәыла руааԥсыра Аԥсны ахьчаразы игылеит.
Аҳәынҭқарра ахада Бадра Гәынба Сергеи Дбар ихьӡ зху Гәдоуҭатәи амузеи аҿы еиҿкаау ацәыргақәҵа даҭааит.Араҟа иаарԥшуп аибашьраан аԥсуа сахьаҭыхыҩцәа иаԥырҵаз акарикатурақәеи ашаржқәеи ҳәа аанацҳауеит аҳәынҭқарра ахада ипресс-маҵзура.Гәынба иазгәеиҭеит, ацәыргақәҵақәа анаҩстәи абиԥарақәа рзы Аԥсны ажәлар иаадырԥшыз афырхаҵара агәалашәара аиқәырхараҿы ишыцхраагӡоу.
"Ҳара арахь ҳааԥхьара аҭахӡамызт, ҳара ҳгәы-ҳаԥсы арахь иҳаԥхьон".Аахыҵ Уаԥстәылеи Чечентәылеи рҟнытә хатәгәаԥхарала еибашьуаз Игор Валиеви Анзор Магомадови Гәдоуҭаҟа иааит агәалашәаратә усмҩаԥгатәқәа рхы рыладырхәырц. Сара аԥсуа жәлар рҽеидыркыларц, Аԥсны рыхьчаларц рзеиӷьасшьоит, ауаа ҭамхаларц, анацәа алаӷырӡ карымԥсаларц", — иҳәеит Магомадов.
Аԥсны акультура аминистрра иреиӷьу абаҟақәа рпроектқәа рзы ҩеицлабрак рыларҳәеит.Актәи Аԥсны жәлар рпоет Иуа Коӷониа ибаҟазы. Абаҟа ықәыргылахоит апоет ихьӡ зху Аҟәатәи абаҳча маҷ аҿы. Уаанӡа игылаз апоет ибиуст аибашьраан ақырҭуа ир еихсны идырбгеит.Арзаҳалқәа рыдыркылоит цәыббра 15 рҟынӡа.Аҩбатәи аицлабра – Аԥсны аҩбатәи ахада Сергеи Багаԥшь ибаҟазы. Абаҟа ықәыргылахоит Очамчыра араион ахадара ахыбра аҿаԥхьа. Аицлабра мҩаԥысуеит 2026 шықәса жәабран 2 рҟынӡа. Иреиӷьу апроектқәа равторцәа 200-200 нызқь мааҭ ранашьахоит.
Аԥсни Урыстәылеи рҳәааҿы иаанкылан аконтрабандатә асигарет зҭаз ҩ-машьынак.Еиду Арабтәи Аемиратқәа рҿы иҭрыжьыз 1280 ҭоԥ асигарет автомашьына Suzuki Grand Vitara акәырқәа рыԥшьбагьы рҿы иҵәахын.Даҽа 1340 ҭоԥ европатәи асигаретқәа рыԥшааит автомашьына Infiniti абампер аҿи, акәырша аҵаҟаҿи, ҷыдала еиқәыршәаз амашьына аҿышәҭеи рҿы.Аҭаҭынаалыҵқәа урыстәылатәи акцизтә дыргақәеи ихымԥадоу адыргақәеи рымамызт ҳәа аанацҳауеит Аладатәи аҳазалхратә усбарҭа.Аконтрабандеи амашьынақәеи рымхуп, амҩангаҩцәа аҭакԥхықәра рыдҵараз азҵаара рыӡбоит.
Аԥснытәи аҳәынҭқарратә университет абиблиотека иаиуит Москватәи аҳәынҭқарратә университет аҟнытә ашәҟә ҿыцқәа. Ари Москватәи аҳәынҭқарратә университет аполитологиа афакультет аҟнытәи алитература аҩбатәи ахәҭа ауп. "Уажәазы 30 рҟынӡа еиуеиԥшым ашәҟәқәа аагоуп. Иааидкыланы, хәҭацыԥхьаӡа 30-50 екземплиар ыҟоуп", — ҳәа аҳәоит ААУ акьыԥхьымҭаҿы.