Аԥсны иаԥҵоуп "Иаку асоциалтә шәахтә азы" азакәан ахыркәшаразы аусуратә гәыԥ.Абри азы адҵа инапы аҵаиҩит Аԥсны ахада Бадра Гәынба, ҳәа аанацҳауеит аҳәынҭқарра ахада ипресс-маҵзура.Агәыԥ напхгара аиҭот Аԥсны ахада ихаҭыԥуаҩ Беслан Бигәаа. Агәыԥ иалахәуп аҳәынҭқарра ахада Иусбарҭеи, Аминистрцәа Реилазаареи, Жәлар Реизара-Апарламенти, апрофильтә министррақәа рхаҭарнакцәеи афондқәа рнапхгаҩцәеи.Аҳәынҭқарра ахада анапынҵа ҟаиҵеит 2025 шықәса абҵарамза 3-нӡа азакәанԥҵара аиӷьтәразы ажәалагалақәа рыдгалара.
Ԥсҳәы аенергосистема арҿыцра актәи ахәҭа хацыркуп.Аҟазацәа абетон еибыркырақәа рҭартәара иалагеит, аӡкыра аҟнытә агенерациа аҟынӡа аӡеизакырҭа еиҭашьақәдыргылеит. Иара убас, Ԥсҳәытәи аӡфымцастанциа ахыбраҿгьы арҽеиратә усурақәа мҩаԥысуеит ҳәа аанацҳауеит Аенергетика аминистрра.
Аԥснытәи аенергетикцәа "Росатом Энергосбыт" ашьаҭала аҵара иахысит .Апрограммаҿы иарбан аҭиратә еилахәырақәа русура аиҿкаара, амчхаратә еиҿкаарақәа русеицура, аиқәшаҳаҭратә усуреи ахәаахәҭыҩцәа рымаҵзуреи, ауал зқәуи ацифратә технологиақәеи напхгара рыҭара уҳәа атемақәа рыла ҳәа аанацҳауеит Аенергетика аминистрра.Онлаин-курс иахысит 11-ҩык аҟазацәа. Иара еиҿкаан Аԥсни Урыстәылеи аенергетика аминистррақәа русеицура аҳәаақәа ирҭагӡаны.
Гагра араион аҿы аӡхагалагатә станциақәа ԥшьба еиҭашьақәыргылахоит. "Акапиталтә ргылара аусбарҭа 2013 шықәсазы идыргылаз аӡхагалагатә станциақәа гәанаҭоит иарбоу ауснагӡатәқәа рҳәаа иҭагӡаны. Иахьа ҳара ҳҿаԥхьа дҵаны иқәгылоуп урҭ реиҭашьақәыргылара", —иҳәеит аусбарҭа аиҳабы Демир Гамсаниа. Аусурақәа араион ауааԥсыра ӡыржәтәла реиқәыршәара иазырхоуп.
Аҟәа ахәҭак алашара ҟалаӡом нанҳәа 19-20 рзы.Авольт ҳаракы "Гәымсҭа" аҟны иарбоу аиҭашьақәыргыларатә усурақәа инарымаданы, асааҭ 05:00 инаркны 07:00 рҟынӡа аамҭала ирцәахоит астанциа маҷ "Аҟәа-2" ҳәа аанацҳауеит Аенергетика аминистрра.
Гәдоуҭа Сергеи Дбар ихьӡ зху Аҳәынҭқарратә музеи аҿы асахьаҭыхҩы-авангардист Беслан Арӡынба раԥхьатәи ихатә цәыргақәҵа аатит.Ацәыргақәҵа Аԥсны раԥхьатәи ахада Владислав Арӡынба изкуп. Уаҟа ицәыргоуп автор иусумҭақәа 43, дара абстракциа аелементқәа рыла асиурреализм астиль ала инагӡоуп."Атемақәа зынӡа еиԥшым: иҟоуп асоциалтә мотивқәа, афантастикабжатә сиужетқәа, схатәы фантазиақәеи, схәыцрақәеи", — ҳәа иҳәеит асахьаҭыхҩы.Арӡынба иазгәеиҭеит, аусумҭақәа реиҳарак ашкәакәеи аиқәаҵәеи рыла ишынагӡоу, уи изааигәаз ауаҩы ицәыӡра ашьҭахь, ихьаақәа ишрыдҳәалоу.