Аԥсны ахада Бадра Гәынба Аминистрцәа реилазаара ириҭаз анапынҵақәа рынагӡара шцо азы иааиԥмырҟьаӡакәа аҳасабырба ҟарҵаларц адҵа риҭеит. Урҭ рынагӡашьа ахылаԥшра идиҵеит Ахада уусбарҭа анапхгаҩы Беслан Ешба. Уи, иара убас, атәыла анапхгара алахәылацәа рахь ааԥхьара ҟаиҵеит атәылауаа зықәшәо ауадаҩрақәа еиҳа хшыҩзышьҭра рырҭаларц. "Ауаа шәрыҿцәажәала, рыуадаҩрақәа шәыӡбала – абри ауп ҳара ҳаззықәԥо", — ҳәа азгәеиҭеит Гәынба.
Урыстәылантәи Аԥсныҟа акоммерциатә фымцамч аашьҭра иалагеит нанҳәа 1 инаркны ҳәа радио Sputnik иазеиҭеиҳәеит "Амшынеиқәафымцамч" адиректор хада Ҭимур Џьынџьал.Иара иажәақәа рыла, цәыббрамзазгьы афымцамч Урыстәылантә иаалоит. Бжьаратәла мызкахьы 19 миллион кВтсааҭ ҟалоит. "Абри азы аӡбара идикылеит аҳәынҭқарра ахада Бадра Гәынба. Уи ЕгрыГЕС аӡытә лшарақәа реиқәырхаразы иаҭахуп. Афымцамч Гьачрыԥшьтәи ацәаҳәала иаарышьҭуеит", — ҳәа азгәеиҭеит Џьынџьал.
Аԥсны аделегациеи Шьамтәыла иҟоу ачерқьес диаспора ахаҭарнакцәеи акультуратәи асоциалтәи усхкқәа рҿы аусеицура азҵаарақәа ирылацәажәеит. Аԥсуаа, адыгаа, абазақәа, ачерқьесцәа, егьырҭ урҭ ирзааигәоу ажәларқәа еидызкыло Шьамтәыла иҟоу жәларбжьаратәи аиҿкаара "Адыгэ Хасэ" ахаҭарнакцәеи дареи реиҿцәажәарақәа рхы аладырхәит Ачерқьесцәа рассоциациа ахантәаҩы Хишам Кат, Ачерқьес уаажәларратә еидгылара ахантәаҩы Абдуррахман Багаса ҳәа аанацҳаит Адәныҟатәи аусқәа рминистрра.
Урыстәыла атәылауаҩра змоу, Урыстәылатәи Афедерациаҿы ахәыҷқәа рзы аԥаратә цхыраагӡақәеи ан лмали зауз Аԥсны атәылауаа азинтә цхыраара рыҭаразы Аусутә гәыԥ 200-ҩык рҟынӡа ауаа адҵаалахьеит. Абри атәы иҳәеит асоциалтә еиқәыршәара аминистр Руслан Аџьба ахада иԥылараҿы. Уи иазгәеиҭеит, аусбарҭа адыррақәа рыла, 1000-ҩык инареиҳаны ауаа ари апроблема ишақәшәахьоу, аха азыҳәақәа маҷны иаларгалоит ҳәа.