Волгоград имҩаԥысуаз Урыстәылазегьтәи арра-патриоттә хәмарра "Зарница 2.0" алахәылацәа Аԥсныҟа ихынҳәит. Ахақәиҭра ашҭаҿы акоманда дырԥылеит ареспублика аҵара аминистр Хана Гәынԥҳа. "Шәықәгылара бзиа шәыдысныҳәалоит. Ииашаҵәҟьаны, даара ҳшәыргәырӷьеит, избанзар шәкы инареиҳаны акомандақәа злахәыз ахәмарраҿы, Аԥсны еизгоу акоманда даара ибзиаз алҵшәа аанарԥшит. Иара убас ҳара ҳзы игәазырҳагоуп 103-ҩык акомандаҟаҵаҩцәа ахьыҟаз ҳара ҳтәы деиӷьуп ҳәа дахьалкааз" — ҳәа лҳәеит лара.
Аԥшьгамҭа "Аполиклиникақәа рҿы ахәыҷтәы уадақәа" адгалара арҭеит "Аԥсны акоманда" афиналистцәа. Апроект аҳәаақәа ирҭагӡаны, Аҟәа, Гагра, Гәдоуҭа, Очамчыра, Гал уҳәа амедицинатә усбарҭақәа хәба рҿы ахәыҷқәа рзы иҷыдоу ауадақәа аартхоит, апациентцәа хәыҷқәа рзы иманшәалоу аҭагылазаашьа аԥҵаразы. Уажәы адизаин-проект аус адулара иаҿуп Урыстәылеи Аԥсни рыспециалистцәа. Аҟәатәи аполиклиникаҿтәи ауадазы лескиз мазеиуп.
Аиааира амш иазку маланыҟәала аиԥхныҩлара мҩаԥысуеит Аҟәа цәыббра 30 рзы. Аусмҩаԥгатә алахәылацәа Леон ипроспект 1 аҟнытә ашьыжь асааҭ 9:30 рзы идәықәлоит. Рымҩа ахырхарҭа, Владислав Арӡынба имемориал иаҩсны "Памтрек-площадка" аҟынӡа инеины ҩаԥхьа аҟазарҭахь ихынҳәуеит. "Памтрек-площадка" аҿы амаланыҟәатә спорт азы аҟазара-классқәа мҩаԥгахоит, аԥсшьареи аҽазыҟаҵарақәеи рзы аҭыԥ ҿыц ӡыргахоит.
Аԥсны аветеринартә лабораториаҿы иқәыргылахоит аиммуноферменттә анализҟаҵагеи апланшеттә ӡхьыршагеи. Абри атәы иҳәеит арадио Sputnik аҟны Аԥсны аветеринар хада Роман Џьопуа. "Амаругақәа аахәаны иҳамоуп, уажәазы урыстәылантәи аспециалистцәа ҳарзыԥшуп. Ҳлабораториаҿы урҭ анықәҳаргылалакгьы алшара ҳауеит акәтқәа ирылалыз ачымазара аилкаара", — иҳәеит иара.