Бадра Гәынба Аԥсны жәлар Аиааиреи Ахьыԥшымреи рымш рыдиныҳәалеит." Аԥсны жәлар рџьынџьтәылатә еибашьра аҭоурых аҟны Аиааира дасимволны дыҟоуп ҳмилаҭ рԥыза ду, Аԥсны раԥхьатәи ахада Владислав Григори-иԥа Арӡынба, уи иарӷьажәҩаны идгылеит ар рԥыза ду Султан Сосналиев, аинрал Сергеи Дбар, егьырҭ акомандаҟаҵаҩцәа ҳәа азгәеиҭеит атәыла ахада.Иара убас хатәгәаԥхарала Аԥсны еибашьуаз зегьы иҭабуп ҳәа реиҳәеит.
Зхатәы бызшәеи зкультуреи рыхьчара амҩа иану Аԥсны ажәлар рзы — Аиааира амш иҷыдоу мшуп, абри атәы азгәеиҭеит Урыстәыла ахада Иусбарҭа анапхгаҩы актәи ихаҭыԥуаҩ Сергеи Кириенко.Уи иқәгылараҿы инаҵшьны иазгәеиҭеит Аԥсны раԥхьатәи ахада Владислав Арӡынба ироль ҷыда. Арӡынба иоуп ҳаамҭазтәи аԥсуа ҳәынҭқарреи Аԥсни Урыстәылеи рыбжьара иӷәӷәоу аизыҟазаашьақәа рыбжьаҵара атрадициеи рышьаҭа зкыз ҳәа азгәеиҭеит Кириенко.
Аиааира амш аламҭалазы Аҟәа Аԥсны жәлар Рџьынџьтәылатә еибашьра аветеранцәеи хатәгәаԥхарала аибашьцәеи аҳамҭақәа ранашьан.Аусмҩаԥгатә еиҿыркааит Аԥсны Аџьынџьтәылатә еибашьра аветеранцәа рфонд ацхыраарала аиҿкаара "Ахатәгәаԥхарауааи" ареспублика аҿы иҟоу Аурыс уаажәларреи.1992-1993 шықәсқәа рзы аибашьра аветеранцәа Аԥсны Атәылахьчара аминистрра амедалқәеи "Аиааиразы" амедалқәеи ранашьан. Иҷыдоу ааратә операциаҿ иҭахаз Даӷьсҭантәи аибашьцәа ранацәеи рыҳәсеи Аԥсныҟа ааԥхьара рыҭан "Хатәгәаԥхарала аибашьҩы" амедал ранашьаразы.
Аԥсны ахада Бадра Гәынба Урыстәыла ахада Иусбарҭа аиҳабы актәи ихаҭыԥуаҩ Сергеи Кириенкои, Москватәи аобласт агубернатор Андреи Воробиови дырԥылеит Аганқәа русеицура апрограмма иалацәажәеит, асоциал-економикатә усхкқәа рҿы еицырзеиԥшу апроектқәа рынагӡаразы анаҩстәи ашьаҿақәа азгәарҭеит, абри атәы аанацҳауеит аҳәынҭқарра ахада ипресс-маҵзура."Ари Аиааира ҳара ҳзы иԥшьоуп, ҳажәлар зегьы рзы акыр зҵазкуа ари амш аҽны шәара ара шәыҟазаара аиҩызареи аҳаҭырқәҵареи ирдыргоуп", — инаҵшьны иазгәеиҭеит Бадра Гәынба.
Очамчыреи Тамбовтәи аобласт ақалақь Мичурински аусеицуреи аҩызареи рзы аиқәшаҳаҭра рыбжьарҵеит. Араион ахада Алхас Кациа инаҵшьны иазгәеиҭеит (Мичуринск абиологиеи ақыҭанхамҩеи рҿы иԥхьагылоу атехнологиақәа рыла еицырдыруа аҭҵаарадырратә қалақьны ишыҟоу, насгьы аԥышәа аимдараз аинтерес шыҟоу. Мичуринск ақалақь ахада Максим Харников Очамчыра араион ақыҭанхамҩеи атуризми рҿы иамоу алшарақәа азгәеиҭеит, еиуеиԥшым ахырхарҭақәа рыла аусеицура ашьақәыргыларазы агәазыҳәара ааирԥшит ҳәа аанацҳауеит Ochamchira_inform.
Мықәашҭа имҩаԥысуаз аҽыбӷаҟазаратә еицлабрақәа рҿы аиааира згаз рыхьӡқәа еилкаауп. Ҩымш ицоз аицлабрақәа азкын Аиааира 32 шықәса ахыҵра.Арасаӡыхь ақыҭантәи акоманда ҽыла ампыл асраҿы актәи аҭыԥ ааныркылеит, иара убас аҵәеигәыдҵараҿгьы актәи аҭыԥ ранашьан. Аԥсуа жәлар рыхәмарра аимҵакьачраҿ Қәҭолатәи акоманда аԥыжәара аанакылеит.