Атәыла ахада Бадра Гәынба инапхгарала "Аԥсны акоманда" афорум аатит Аҟәа."Амҽхак змоу, акыр зҵазкуа афорум "Аԥсны акоманда" аартра иалахәу зегьы бзиала шәаабеит. Ахьӡ ахаҭа иаҳәоит — ҳара зегьы хықәкык еиднакыло ауаа ҳауп, уи ҳтәыла ӷәӷәаны, еизҳазыӷьо, анхаразы иманшәалоу ҭыԥны аҟаҵароуп", — иҳәеит атәыла ахада. Иара иазгәеиҭеит, еизаз рхыԥхьаӡараҿы иҟоуп Аԥсны ԥхьаҟатәи аԥеиԥш зхьыԥшу — Аԥсны анапхгара рхаҭарнакцәа, аекспертцәа, аҵарауаа, анаплакҩцәа, ауаажәларратә усзуҩцәа. Аусмҩаԥгатә алахәылацәа "Зысасгәашә аарту Аԥсны", "Амедиа ҿыцқәа", "Аԥсны аԥҵаҩцәа", иара убас "Сенеж" анапхгаратә усмҩаԥгатәқәа рҳәаақәа ирҭагӡаны иаԥҵоу апроектқәеи ажәалагалақәеи ӡырыргоит.
Бадра Гәынба Урыстәыла ахада Владимир Путин иирамш идиныҳәалеит. Аԥсны ахада иазгәеиҭеит Путин — ҳаамҭазтәи адунеитә ԥхьагылаҩцәа рыбжьара еиҳа анырра ҟазҵо напхгаҩны дшыҟоу. "Шәҟәыӷара, ахара шәхәыцра, шьаҿа-шьаҿала имҩаԥыжәго аполитика иабзоураны адунеи атәылақәа рыбжьара — Урыстәыла иӷәӷәаӡоу аҭыԥ ааннакылоит, жәларбжьаратәи ашәарҭадареи аҭышәынтәалареи рырӷәӷәараҿы алагала ду ҟанаҵоит", — аҳәоит адныҳәалараҿы. Бадра Гәынба Владимир Путин иҭабуп ҳәа иеиҳәеит Аԥсны ашәарҭадареи асоциал-економикатә ҿиареи рзы иҟаиҵо адгыларазы, агәабзиареи аихьӡарақәеи изеиӷьеишьеит.
Урыстәылатәи аныҟәцаратә гәраргагақәа 11 460 цыра рырҭахьеит Аԥсны мшаԥымза 14 раахыс. 807 гәраргагақәа хианы ишьҭоуп, абри атәы иҳәеит Аҳәынҭавтоинспекциа аиҳабы Дамеи Аҩӡба. Аҩӡба иажәақәа рыла, Аԥсны атәылауаа рзы Урыстәылатәи амашьынаныҟәцаратә гәраргагақәа ирмариоу аԥҟарақәа рыла роура рылшоит мшаԥымза 1 2026 шықәсанӡа. Уи ашьҭахь Урыстәыла азеиԥш ԥҟарақәа рыла рышәҟәқәа аларҵар ҟалоит.
Аҟәатәи амузыкатә ҵараиурҭа акапиталтә ремонт акыраамҭа ҳаззыԥшыз хҭысуп лҳәеит ашкол адиректор Нинель Бжьаниаԥҳа, арадио Sputnik аинтервиу аҭо. Лара иазгәалҭеит сынтәа аусбарҭа 95 шықәса шахыҵуа, иара ахьыҟоу ахыбра аҭоурых-культуратә ҭынха ҳәа ишыԥхьаӡоу. Нинель Бжьаниаԥҳа лажәақәа рыла, аибашьра ашьҭахьтәи ашықәсқәа рзы аҵараиурҭаҿ хәҭа-хәҭала аиҭашьақәыргыларақәа мҩаԥган, аха аусура дуқәа ҟаҵамызт ҳәа. "Ҳаиҳабыра ари азҵаара даара ахшыҩзышьҭра анаҭоит, избанзар аибашьра ашьҭахь ахыбра аҭагылазаашьа даара иҽеимкәа иҟан. Ахыб ҟаҵоуп, аӡы мҩангоуп, ауадақәа еиҭарҿыцуп", - лҳәеит лара.