Аԥснытәи аделегациа Санкт-Петербург имҩаԥысуаз акреативтә економиказы Жәларбжьаратәи аконференциа иалахәын. Аусмҩаԥгатә еиднакылеит 1500-ҩык алахәылацәа – БРИКС, ИАР, ШОС рҳәынҭқаррақәа рҟынтәи 30 тәылеи MENA арегиони рҟынтәи, абри атәы аанацҳауеит акультура аминистрра. Аконференциа аҳәаақәа ирҭагӡаны 50 рҟынӡа бизнес-усмҩаԥгатә мҩаԥгахоит — аишәа гьежьқәа, аиҿцәажәарақәа, аҟаза-иклассқәа, аӡыргарақәа, иаарту адиалогқәа уҳәа рыла.
Аԥсны акультура аминистрреи "Астратегиатә ԥшьгамҭақәа рзы амаҵзуреи" аусеицуразы амеморандум рнапы аҵарҩит. Адокумент рнапы аҵарҩит Аԥсны акультура аминистр Даур Ақаҩбеи "Астратегиатә ԥшьгамҭақәа рзы амаҵзура" адиректор хада Светлана Чупшевеи, абри атәы аанацҳауеит акультура аминистрра.Аганқәа агәрагара аадырԥшит рылшарақәеи рресурсқәеи реиларҵәарала акультуратә еимадара арӷәӷәареи аҟазара еимдара аҿиареи ирызку еицырзеиԥшу апроектқәа рынагӡара алыршахоит ҳәа.
Аԥсны Арбџьармчқәа рҿы артиллериа адәныҟатә ҽазыҟаҵарақәа хацыркхеит. Аусмҩаԥгатәқәа еидҵоу ар разыҟаҵаратә полигон "Ҵабал" аҿы имҩаԥысуеит, урҭ жьҭаара 18 рҟынӡа имҩаԥыслоит, абри атәы аанацҳауеит Аԥсны атәылахьчара аминистрра."Азыҟаҵарақәа зызку аибашьратә еиқәыршәара аиҿкаареи, аиҵаҟәшақәа рнапхгареи, егьырҭ архәҭақәа аус рыцуреи рҿы акомандаҟаҵаҩцәа рыпрактикатә ҟазара аизырҳароуп", — азгәеиҭеит аҽазыҟаҵарақәа рнапхгаҩы, аполковник Андреи Лиубовски.
IV Жәларбжьаратәи ахәыҷқәеи аҿари рырҿиаразы аинклиузивтә фестиваль "Ҳәаа змам адунеи" жьҭаара 11 - 18 рзы Аԥсны имҩаԥысраны иҟоуп. Аинвалидцәа рзы ареабилитациатә центр "Ҳара ҳаицуп" анапхгаҩы Милана Аџьԥҳа Sputnik ишазеиҭалҳәаз ала, афестиваль еиҿнакаауеит ахәыҷқәа-аинвалидцәа рҭаацәа Жәларбжьаратәи Рассоциациа, Урыстәыла Аҳәынҭқарра ахада игрантқәа Рфонди Аԥсны ахада Иусбарҭеи рыцхыраарала. "Ари раԥхьатәи урыстәыла-аԥснытәи аинклиузивтә фестивальуп, уи Аԥсны ԥшь-қалақьк рҿы имҩаԥысуеит: жьҭаара 11 рзы — Гагратәи Акультура аҩны, жьҭаара 13 рзы — Гәдоуҭа, жьҭаара 15 рзы — Аҟәа Аҳәынҭқарратә филармониа, жьҭаара 18 рзы — Очамчыра", — лҳәеит лара.
*