Очамчыра араион аҿы алашара арцәаразы аамҭала аихшанҵа алагалоуп.Жьҭаара 16 инаркны 31 рҟынӡа, есыҽны, асааҭ 10:00 инаркны 16:00 рҟынӡа астанциа маҷқәа "Мықәи" "Кәачареи" лашарада иҟазаауеит ҳәа адырра ҟанаҵеит Аенергетика аминистрра.Алашара арцәара зыхҟьо 35 кВ зымчхара ыҟоу афымцамҩангагатә цәаҳәа "Мықә" аҿы арҿыцратә усурақәа роуп.
Аԥснытәи аҳәынҭқарратә университет аҿы ихацыркхеит астол гьежь "Аԥсни Урыстәылеи: еицырзеиԥшу ацивилизациатә мҩа" аусура.Аусмҩаԥгатә иалахәу рхыԥхьаӡараҿы иҟоуп: Аԥсны ахада Бадра Гәынба, асоциалтә процессқәа рыхылаԥшреи анализ рыҭареи рзы Урыстәыла ахада Иусбарҭа анапхгаҩы Александр Харичев.Астол гьежь аартраҿы Бадра Гәынба аиҿкааҩцәа ҭабуп ҳәа реиҳәеит ас еиԥш акыр зҵазкуа аҵаратә платформа ахьышьақәдыргылаз азы.Александр Харичев иазгәеиҭеит Урыстәыла асоциалтә напхгара аганахь ала иамоу аԥышәа Аԥсны азгьы ихәарҭахар шалшо.
Британиеи Украинеи рыԥшыхәратә маҵзурақәа рҽазыҟарҵоит агазмҩангага "Ҭырқәтәылатәи амҩас" аганахьала адиверсиа амҩаԥгара ҳәа аҳәамҭа ҟаиҵеит Афедералтә шәарҭадаратә маҵзура анапхгаҩы Александр Бортников.АфШәМ излаанацҳауа ала, MИ-6, SAS ринструкторцәа Урыстәыла, Ҟазахстан, Еиду Америкатәи аштатқәа акционерцәас измоу Каспиатәи амҩангагатә консорциум аобиектқәа, адронқәа рыла рыжәларазы асценари аус адырулоит. Иара убас, аӡсацәа еибашьцәеи амшынтә дронқәеи рхархәара ргәы иҭоуп.
150 тонна инареиҳаны амандарина Аԥснынтәи Урыстәылаҟа ииаргахьеит цәыббрамза анҵәамҭа инаркны.Шәачатәи аҳазалхратә усбарҭа излаанацҳауа ала, иҟалаз аԥхаррақәа ирыбзоураны аидара раԥхьатәи ахәҭа аиагара иалагеит уаанӡа аасҭа заа. Иҳаҩсыз амш иалагӡаны ареспублика аҟнытә иалгоуп 50 тонна ацитрустә шәырқәа, аҳазалхратә усмҩаԥгатәқәа ирццакны имҩаԥысуеит. Амандарина адагьы, Урыстәылаҟа ииааргоит аԥсуа лимон, афеихоа, араса, ахәырма. Ақыҭанхамҩатә аалыҵқәа зегьы 250 тонна иреиҳауп.
Аҟәатәи аҳаирбаӷәаза аадыртиижьҭеи 110 нызқьҩык инареиҳаны ауаа уи амаҵзурақәа рхы иадырхәахьеит. Ари амҭа иалагӡаны 520 инареиҳаны реис мҩаԥган, 887 тонна инареиҳаны абагаж аус адулан, ҳәа аанацҳауеит аҳаирбаӷәаза апресс-маҵзура. Аҳаирпланқәа ԥыруеит Москва, Санкт-Петербург, Нижни Новгород, Ханты-Мансииск ахырхарҭақәа рахь.