Аҟәа иҟаз ахысраз агәҩара ззыҟоу ҩымз ҳәа дырбаандаҩуп. Асҭамыр Шьынқәба иганахьала аӡбарҭа аӡбара аднакылт ҳәа Sputnik иазааицҳаит Аҟәа ақалақь апрокурор Алхас Агәмаа. Иара убас иара иҳәеит иахьа апрокуратура азыҳәа шынанашьҭуа абри аус иадҳәало даҽаӡәы — Шараҭ Џьыкырба ирбаандаҩразы.
"Ҳара даҽазныкгьы агәра аагеит — ҳаҷкәынцәа агәымшәареи аӷәӷәареи шрылоу", — абас аҳәамҭа ҟаиҵеит Аԥсны ахада Бадра Гәынба. Афестиваль "RТ: Док: Ҳфырхацәа раамҭа" аартраан уи инаҵшьны иазгәеиҭеит аԥсуаа аиаша иадгыланы, урыстәылатәи аруаа рыжәҩахыр рымаданы ишеибашьуа."Раԥхьатәи амшқәа инадыркны, 2014 шықәса инаркны, ҳџьынџьуаа рхатәгәаԥхарала, ргәы ишрыҵанаҳәоз ала, Донбасс ауааԥсыра рыцхраара иалагеит, 1992 шықәсазы Урыстәыла еиуеиԥшым арегионқәа рҟынтәи ахатәгәаԥхарауаа ҳара ҳахь ианаауаз еиԥш", — иҳәеит иара RT ахҳәаа аҭо.
Аԥсны ахада Цандрыԥшьтәи ашкол аремонт амҩаԥысшьа гәеиҭеит. Закәандарала ахатәтәра зызуз ахыбра аҳәынҭқарра иазырхынҳәуп ҳәа аанацҳауеит аҳәынҭқарра ахада ипресс-маҵзура. Аремонт аҭыԥантәи анапхгара ахарџьла имҩаԥысуеит. Бадра Гәынба иҳәеит апроцесс арццакразы аҳәынҭқарра араион афинанстә цхыраара шанаҭо. Иара убас, ахыбра ахәҭак хәыҷбаҳчаны иҟаҵазарц азы ажәалагала ҟаиҵеит атәыла ахада. Ари ашкол Цандрыԥшь раԥхьатәи аԥсуа школхоит. Уи 600-ҩык ахәыҷқәа рыдкылара алшо иҟалоит.
Алаҳаӡы ақыҭан иҟоу астанциа маҷ аремонт ашьҭахь амчхара ҩынтәны еизҳаит. Астанциа аусушьа даҭааны ибеит атәыла ахада.Иара араион аҿы зегь реиҳа идуқәоу ируакуп, астратегиатә ҵакы амоуп ҳәа иҳәеит Акапиталтә ргыларатә усбарҭа анапхгаҩы Демир Гамсаниа. Астанциа маҷ амчхара 20 МВт иҟан, аха аремонт ашьҭахь 40 МВт рҟынӡа еизҳаит. "Ҳара трансформаторк шьақәҳаргылахьеит, хара имгакәа аҩбатәи аахәара ҳгәы иҭоуп. Уи абзоурала азеиԥшмчхара зегьы 80 МВт инаӡо иҟалоит", — иҳәеит Гамсаниа.