Бадра Гәынба дрыдышшылеит Никита Симониан иҭаацәа, абри атәы аанацҳауеит атәыла ахада ипресс-маҵзура. Аҳәынҭқарра ахада иазгәеиҭеит, Симониан Аԥсны ҳаҭыр ду шиқәу: иара ихәыҷрашықәсқәа Аҟәа имҩасит, ашьапылампыл ахь раԥхьатәи ишьаҿақәа ара еихигеит, "Динамо- Аҟәа" иреиӷьӡаз ашьапылампыласцәа дреиуан. Анаҩс, Аԥсны дышнымхозгьы ареспубликеи иареи еснагь аԥхарра рыбжьан. "Аԥсуа жәлар зегьы шәызгәдуун, ус шәагьаанхоит", — ҳәа азгәаҭоуп адышшыларатә шәҟәаҿы.
Иауз Аҭрышба Ҭырқәтәыла иҟоу аԥсуа культуратә хеилакқәа рфедерециа ахантәаҩыс далхуп. Алхрақәа мҩаԥысуан Диузџьа ақалақь аҿы, Аҭрышба адгылара ирҭеит аиазара иалахәыз реиҳараҩык. Иауз Аҭрышба Аԥсны жәлар Рџьынџьтәылатә еибашьра даветерануп. Имаҵураҭыԥ идиныҳәалеит атәыла ахада Бадра Гәынба. "Аԥсны ашәарҭара ианҭагылаз бџьаршьҭыхла уашьцәа урывагылан уԥсадгьыл ухьчон, агәраганы сыҟоуп, Афедерациа анапхгараҿы аихьӡара дуқәа шаауырԥшуа", - азгәеиҭеит Бадра Гәынба.
Гагра араионтә Еизара ҿыц ақалақь ӡыла аиқәыршәареи Алаҳаӡы ақыҭан иҟоу агәамсамкажьырҭа иадҳәалоу азҵаарақәеи раԥхьа иргылан рыӡбра иалагоит, абри атәы иҳәеит Аизара ахантәаҩы Борис Бениа. Уи иазгәеиҭеит арҭ азҵаарақәа ауааԥсыра даара ргәы иҵхо ракәны ишыҟоу. Ақалақь ӡыла аиқәыршәара далацәажәо, Бениа иҳәеит, уажәтәи аамҭазы Аинвестициатә программа ахархәарала аӡеизакырҭақәеи аӡҭыгагатә станциақәеи реиҭашьақәыргылара иаҿуп ҳәа. Аха, ақалақь аӡымҩангагақәагьы азхьаԥшра рҭахуп, Аизара ари апроблемагьы аӡбуеит.
Аԥсуа самбист Инал Гаделиа Казань агран-при даиааит. IX жәларбжьаратәи аицлабра "Ҭаҭарсҭан Ареспублика ахада Ихраҿа" агаразы афинал аҟны иара дииааит 98 кьыла инеиҳаны зыкапан ыҟоу урыстәылауаҩ Аслан Џьиоев. Атурнир аҟны аџьаз медалқәа ргеит аԥсуа спортсменцәа — Раҳман Напиџьев, Мурат Аров. Адунеи ахраҿа агаразы аицлабрақәа рахь алԥшааратә турнир иаҩызахаз аспорттә еиндаҭлара иахьа ихыркәшан, уи еиднакылеит аа-тәылак рҟынтәи 140-ҩык алахәылацәа.