Бадра Гәынба Жәлар Реизара-Апарламент ахь анашьҭымҭала дықәгылеит. Атәыла ахада иааԥхьара аҳәынҭқарратә бызшәала далагеит. Аҩнуҵҟатәи азҵаарақәа, агәабзиарахьчара, аҵарадырра, адәныҟатәи азҵаарақәа, атәылахьчареи ашәарҭадареи — ааԥхьараҿы иззааҭгылахо зҵаарақәоуп. "Ареспублика иахнагаз аполитикатә кризис иаанарԥшит — аҳәынҭқарратә напхгараҭара асистема аԥсыҽра, аха уи аан ауаажәларра ҳтәылаҿы аҭынчреи аҭышәынтәалареи реиқәырхара ишашьҭоу", — иҳәеит иара. Гәынба инаҵшьны иазгәеиҭеит ихьыԥшым аҳәынҭқарра аҳәаақәа ирҭагӡаны мацароуп ишеиқәырхатәу абызшәа, акультура, аҭоурыхтә гәалашәара, амилаҭтә хаҿра.
Аԥсуа ҳәынҭқарра арӷәӷәареи аҿиареи — уи амчра аинститутқәеи ауажәларратә еилазаареи рыӷәӷәара, аҳәынҭқарратә напхгараҭара ахаҭабзиара ҳаракы, ҳаамҭа иақәшәо Арбџьармчқәа, азинхьчаратә усбарҭақәеи аӡбаратә системеи лҵшәабзиалатәи русура, аекономикеи асоциалтә усхки рыҿиареи ирыбзоурахоит ҳәа азгәеиҭеит Аҳәынҭқарра ахада Бадра Гәынба. Атәыла ахада иазгәеиҭеит адунеи аҿы имҩаԥысуа ахҭысқәа рҭак шыҟаҵатәу, аха уи аан арҭ ауснагӡатәқәа қәҿиарала рыӡбара ишадҳәалоу — аҳәынҭқарра ԥхьаҟатәи алахьынҵа.
Аԥсуа-аурыс альготатә кредитҟаҵаразы апрограмма 2026-2030 шықәсқәа рзгьы иацырҵоит иҳәеит аекономика аминистр Ҭеимураз Амқәаб.Иара иҳәеит апрограмма аҳәаақәа ирҭагӡаны ареспублика анаплакыҩцәа Урыстәыла альготатә ҭагылазаашьақәа рыла акредитқәа ргар шрылшо. "Уажәазы уи, анаплакқәа рзы аамҭа рацәала зшәара ауа , убри аан ирацәаны изыхшәаатәым аԥара аиуразы имеханизм заҵәыкны иҟоуп" ҳәа , — инаҵшьны иазгәеиҭеит аекономика аминистр Аԥсуа телехәаԥшра иаиҭаз аинтервиу аҿы.Иарбоу апрограммала апроектқәа иааидкыланы 450 инареиҳаны иназыцҵоу аусурҭатә ҭыԥқәа аԥырҵоит.
Аҟәатәи аҳаирбаӷәаза аанаадырт ашьҭахь Гәылрыԥшьи Очамчыреи араионқәа рҿы аинвестициатә лагалақәа рзы азҿлымҳара шьҭыҵит, иара убас ауааԥсыра усурҭала еиқәыршәахеит, атуристцәагьы рхыԥхьаӡареи иазҳаит иҳәеит Аԥсны аекономика аминистр Ҭеимураз Амқәаб амилаҭтә телехәаԥшраҿы иқәгылараан.Аҳәынҭқарратә гәаҭаратә усбарҭақәеи аҳаирбаӷәаза аусзуҩцәеи русурҭатә ҭыԥқәа реиҿкааразы аусурақәа хыркәшоуп, аҩналарҭаҿы ахылаԥшра-гәаҭаратә ҭыԥ ргылоуп иҳәеит иара.Аусурақәа зегьы рхыркәшара азгәаҭоуп ԥхынгәы 1 2026 шықәсазы.
Раԥхьатәи аинклиузивтә плиаж ҟалоит Гәдоуҭа араион аҿы.Апроект иалацәажәеит Аԥсны аинклиузивтә туризм Ассоциациа аиҳабы Руслана Гьергьедааԥҳаи араион ахада Валери Аҩӡбеи. Уи хықәкыс иамоуп — зылшарақәа ԥку ауаа атуристтә ҭыԥқәа рҟны ршәарҭадареи рырманшәалареи.Аҩӡба игәаанагарала апроект асоциалтә ҵакы ду амоуп, аусурҭа ҭыԥ ҿыцқәа раԥҵара алнаршоит.Апроект нагӡахоит Урыстәыла ахада игрантқәа рфонд ацхыраарала.
*