Бадра Гәынба иахьа иҟаиҵаз жәлар реизарахь аашьҭымҭаҿы атәыла аиҳабыра рнапы ианиҵеит 2026 шықәсазы Аԥсны қыҭацыԥхьаӡа адгьылқәаарыхцәа апрограмма аҟынтәи 1 млн мааҭ ишиашоу аԥаразоужьра рзымҩаԥыргаларц.Ақыҭауаа рхала ирыӡбар рылшоит арҭ аԥарақәа еиҳа рхы иахьадырхәаша.2025 шықәсазы ақыҭанхамҩа адгылара иазырхан 150 млн мааҭ, 342 проект нагӡоуп ареспублика араионқәа зегьы рҿы ҳәа азгәеиҭеит Аԥсны ахада.
Аԥсны ахьынӡанаӡааӡо аинфраструктура аҿиаразы 311 усмҩаԥгатә рынагӡаразы иазоужьын 2,161 млрд мааҭ иҳәеит Бадра Гәынба. Иара инаҵшьны иазгәеиҭеит аԥаразоужьра — Урыстәыла афинанстә цхыраара аҟынтәи еиԥш аҳәынҭбиуџьет аҟынтәи ахатәы ԥарақәагьы рыла ишымҩаԥгаз. "Арҭ аусмҩаԥгатәқәа рахь иаҵанакуеит асоциалтәи анџьныртәи инфраструктура хыбрақәа рыргылареи, реиҭашьақәыргылареи рырҿеиреи рзы", — ҳәа азгәеиҭеит атәыла ахада.
Аҟәатәи аҳаирбаӷәаза аанаадырт ашьҭахь Гәылрыԥшьи Очамчыреи араионқәа рҿы аинвестициатә лагалақәа рзы азҿлымҳара шьҭыҵит, иара убас ауааԥсыра усурҭала еиқәыршәахеит, атуристцәагьы рхыԥхьаӡареи иазҳаит иҳәеит Аԥсны аекономика аминистр Ҭеимураз Амқәаб амилаҭтә телехәаԥшраҿы иқәгылараан.Аҳәынҭқарратә гәаҭаратә усбарҭақәеи аҳаирбаӷәаза аусзуҩцәеи русурҭатә ҭыԥқәа реиҿкааразы аусурақәа хыркәшоуп, аҩналарҭаҿы ахылаԥшра-гәаҭаратә ҭыԥ ргылоуп иҳәеит иара.Аусурақәа зегьы рхыркәшара азгәаҭоуп ԥхынгәы 1 2026 шықәсазы.
Гал араион аҿы зегь реиҳа аԥыжәара змоу хырхарҭахеит — ақыҭанхамҩа ҳәа арадио Sputnik аҿы еиҭеиҳәеит араион ахада Константин Ԥлиа.Гал араион ареспубликаҿы ажьынҵәры ааӡара иаҭыԥхадахеит.Иазԥхьагәаҭоуп аефирхәша аиуразы аевкалиптааӡарҭа ахацыркра, иара убас адаԥаҵлақәа реиҭаҳара.Иара убас, араион аҿы традициала аџьықәреии арасеи аадрыхуеит ҳәа азгәеиҭеит иара. Сынтәа 5500 тонна рҟынӡа аџьықәреи жә-нызқь тонна инареиҳаны арасеи еизгоуп Гал араион аҿы
Украинатәи амаҵзура ҷыдақәа рныррала Ставрополь иҟоу урыстәылатәи аррамаҵзурауаҩ имашьына аԥжәара зыгәҭакыз 18 шықәса зхыҵуа урыстәылауаҩԥҳәыс даанкылоуп.Лара лыҭара иахьӡеит атротилтә еквивалент ала 400 грамм зымчхара ыҟоу инапылаҟаҵароу артҟәацга ҳәа адырра ҟанаҵеит Урыстәыла АфШәМ.Аԥҳәызба данааныркылоз амашьына абомба аҵалҵарц лҽазылшәон