Аџьынџьтәылатә еибашьра ду аветеран Евдокиа Котлиарова нхарҭала деиқәдыршәоит. Зуада блыз абырг иахәҭоу ацхыраара лырҭарц Гагра араион анапхгара рнапы ианиҵеит Аԥсны ахада Бадра Гәынба. Котлиарова аамҭалатәи лынхарҭазы ахарџьи иблыз луада аиҭашьақәыргылареи рзы аԥарақәа аҭыԥантәи абиуџьет аҟынтәи иазоужьхоит, абри атәы ааицҳауеит ахада ипресс-маӡаныҟәгаҩ.
Афедералтә Шәарҭадаратә маҵзура Пермтәи атәылаҿацә аихамҩацҳаҿы атеракт аԥнарҟәҟәааит. Даанкылоуп 53 шықәса зхыҵуа урыстәылауаҩ, иара иҳәеит аҭелтә мцҳәаҩцәа рнырра дшаҵанакыз. Иара, "ишәарҭадоу аԥхьаӡамҭақәа " рахь ииаигеит 350 нызқь мааҭ, нас, аԥара архынҳәразы ацәгьоуцәа рыдҵала инапылаҟаҵароу абомба ҟаиҵеит. Иҩны ирыԥшааит 10 кьылак арҭҟәацгақәа, урҭ рзы ахәҭақәа, ацҳа ахылаԥшразы авеб-камера. Ашьаус хацыркуп.
Ахаҵа дҭахеит ареспубликатә мҩаду Тамшь ақыҭан иҟалаз амҩатә машәыр иахҟьаны ҳәа Sputnik адырра аиҭеит Аԥсны Аҳәынҭавтоинспекциа аиҳабы ихаҭыԥуаҩ Аслан Базба. Заанаҵтәи адыррақәа рыла, иҭахаз ахаҵа зыԥсҟы икыз амашьына иԥсабаратәым аиҟарамра аԥхьа иаанҿасыз даҽа машьынаки иареи аахеит. Арныҟәцаҩ иԥшәмаԥҳәыси иҷкәыни, иара убас егьи амашьына апассаџьырцәеи ахәшәтәырҭахь инаган. Зегьы амедцхыраара анроу ашьҭахь, аԥхәыс лыда, егьырҭ аҩныҟа иоурыжьит.
Аԥснытәи КВН акоманда "Фантасмагорцы" 37-тәи жәларбжьаратәи афестиваль"КиВиН-2026" аҿы иқәгылоит. Уи мҩаԥысуеит Шәача ажьырныҳәа 15 инаркны 24 рҟынӡа ҳәа Sputnik иазеиҭеиҳәеит акоманда алахәыла Валери Берзениа."Акоманда аԥҵан мызқәак раԥхьа. Аусура ҳалагеит сынтәатәи ашықәс инаркны. Акоманда шьақәгылоуп 10-ҩык рыла, напхгара арҭоит Ҭемыр Кәакәасқьыри Михаил Цкәуеи. Акапитан — Осман Абыхәба", — иҳәеит иара.Берзениа иажәақәа рыла, "КиВиН" ашықәса алагамҭазы имҩаԥысуеит акомандақәа рабадырреи, анаҩс алигақәа рахь реихшареи рзы. Ари ахәмаррақәа ретап аан иқәгылоит 500 инареиҳаны аколлективқәа.