2025 шықәсазы атәыла анапхгара русура аенергетикаҿы аҭагылазаашьа аҭышәныртәалара иазкын иҳәеит арадио Sputnik аинтервиу азҭаз Аԥсны аԥыза-министр ихаҭыԥуаҩ Џьансыхә Нанба."Аусура алҵшәақәа ааԥшуеит ҳауаажәлар еиԥҟьарада фымцалашарала реиқәыршәараҿы. Ааи, амашәыртә еиԥҟьарақәа рышьҭахь алашара арцәарақәа ыҟоуп, аха ари аенергосистема зегьы иаҭагылазаашьоуп", — ҳәа инаҵшьны иазгәеиҭеит иара. Асеиԥш аҭагылазаашьа зыбзоурахаз ирыдыркылаз аӡбамҭақәа роуп. Агенерациа аоперативтә напхгараҭара знапы алакуи аилахәыра ЕгрыГЕС-и аиҿцәажәарақәа мҩаԥыргеит, урҭ ирылҵшәахеит агидролшарақәа рхархәара асхема аԥсахразы аиқәшаҳаҭра. Уи иалнаршеит Џьуартәи аӡеизакырҭаҿы аӡы иазхаша аҩаӡара аиқәырхара ҳәа азгәеиҭеит аԥыза-министр ихаҭыԥуаҩ.
Аԥсуа милаҭтә шәҵатәы азы аицлабра аинтерес аманы ишымҩаԥысыз еиԥш азҽлымҳарагьы аиуит. Абри атәы арадио Sputnik аефир аҿы ирҳәеит адизаинер Салима Ҳашыгԥҳаи "Иреиӷьу аԥсуа ԥҳәыс маҭәазы" аиааира згаз Сабрина Ԥкьынԥҳаи. Дара иазгәарҭеит, асеиԥш аицлабра акыр шаҵанакуа аԥышәа аимдара анаҩсгьы есҽнытәи ашәҵатәы аҟны аԥсуа елементқәа ралагаларазы. Салима Ҳашыгԥҳа илҳәеит Сарида Ҵәыџьбҳаи лареи ари аицлабраҟны раԥхьаӡа акәны ишцәырыргаз рхатәы бренд "Аԥса". Иазгәалҭеит уи аԥхьаҟа ацҵара ргәы ишҭоу, есҽнытәи амаҭәаҟны иара ахатәы ҭыԥ ааннакылап ҳәагь агәыӷрагьы шлымоу.
Онлаин-маҵзурақәа ахархәаҩ иақәшаҳаҭрада анапаҵаҩраз аԥара имхра азин рыҭахом. Еснагь зыхә ршәо ацифратә напаҵаҩреи егьырҭ амаҵзурақәеи рнапаҵаҩраан атәылауаа рзинқәа рыхьчара иазырхоу аиҭакрақәа Урыстәыла амчра роуеит хәажәкыра 1 инаркны ҳәа РИА Новости иазеиҭарҳәеит Аҳәынҭқарратә Думаҿ. Ирыдыркылаз азакәан ала, аилахәырақәа уаанӡа ирымаз акарта ма абанктә ԥхьаӡамҭа ареквизитқәа рхархәара ҟалом, ахархәаҩ иақәшаҳаҭрада. Ахархәаҩ ԥхьаҟа аԥарашәарақәа мап рцәикыр, амаҵзура ифинанстә дыррақәа рнырра ааннакылароуп. Амаҵзурақәа иара убасгьы ируалԥшьахоит уаанӡатәи ареквезитқәа мап рыцәкразы имариоу, иманшәалоу амҩа аԥҵара.
Урыстәыла арегионқәа рҿы аҳауаҽацәыхьчаратә хархәагақәа уахыкала 11 дрон ҭадырхеит ҳәа аанацҳауеит Атәылахьчара аминистрра. Ростовтәи аобласт аҿы быжь-дронк ҭархоуп. Акака дрон карыжьит Белгородтәи, Курсктәи, Орловтәи аобластқәа рҿи Ҟрыми.