Диоскураа рыԥшаҳәаҿы аҵыргәатә ҭӡы аиҭашьақәыргылара иалагеит. Акәша-мыкәшатәи аҭагылазаашьеи амшынӡи аҭӡы зкыз аибаркыра акыр еиланарбгеит ҳәа иҳәеит ақалақь ахада ихаҭыԥуаҩ Константин Ҭарба. 54 метра иҟоу аҭыԥ аиҭашьақәыргыларазы аргылаҩцәа ажьырныҳәамза нҵәаанӡа иауу адгьылкылҵәаратә шьаҟақәа жәаба ықәдыргылоит. Диоскураа рыԥшаҳәа мҽхакы ҭбаала аиҭашьақәыргылара иалагеит ҵыԥх, ахыркәшара азгәаҭоуп акурорттә аамҭа ааиаанӡа.
Светлана Габуниаԥҳа Аԥсны акультура аминистрра аппарат аҟны акреативтә економикеи акультуратә индустриақәеи рыҟәша ахадас дҟаҵоуп. Аҟәша дҵас имоуп акреативтә индустриақәа рырҿиаразы ауснагӡатәқәа аус рыдулара, зусура амилаҭтә акзаара арӷәӷәара, аҭҵаарадырреи акультуреи рӡыргара, атрадициатә беиарақәа раларҵәара иацхраауа асубиектқәа адгылара рыҭара, иара убас акреативтә економика атәыла аекономикатә системахь аинтеграциа азура.
Иахьа Дырмит Гәлиа иҩны-амузеи ахыбра аиҭашьақәыргыларатә усурақәа ирылагеит. Абри атәы арадио Sputnik аефир аҿы илҳәеит амузеи аиҳабы Светлана Корсаиаԥҳа. Лара лажәақәа рыла, иахьа аусзуцәа аиҭашьақәыргыларазы аҽазыҟаҵаратә усурақәа ирылагеит.Иара убасгьы Корсаиаԥха иазгәалҭеит, амемориалтә зали аекспозициатә залқәеи рҟнытә аекспонатқәа зегьы шиаргахьоу. Аха макьана амузеи аҟны аус шыруа макьана, анаҩс ииасуеит аимлаҭтә библиотека ахыбрахь.
Аҩадатәи акаҷҷара иаха Шәача ауааԥсыра ирбарҭахеит. Урыстәыла арегионқәа жәпакы рҿы ирбоз ацәырҵра мзызс иаиуит амхылдызтә фырҭын ӷәӷәа. Уи иацы ахәылбыҽха иалагеит, иаха иреиҳау иазааигәоу аҩаӡараҟынӡа ихалеит. Уажәы афырҭын ԥсыҽхеит, аха уи уахыки - ҽнаки иреиҵамкәа имҩаԥыслоит, ус анакәха аиҭаҽырӷәӷәара алшоит ҳәа агәҽанҵара ҟарҵоит аҵарауаа.
Аҟәа ахәҭак уаҵәы афымцалашарада иаанхоит. Ашьыжь асааҭ 11:00 инаркны асааҭ 13:00 рҟынӡа астанциа еиҵа "Аҟәа-2" аҟны аиҭашьақәыргыларатә усурақәа ирылагоит ҳәа аанацҳауеит Аенергетика аминистрра.