Аԥсны Ақыҭанхамҩа аминистррахь инашьҭуп 700 миллион мааҭ инареиҳаны изҵазкуа ақыҭанхамҩа аҿиаразы аҳәынҭқарратә программа алахәхаразы арзаҳалқәа. Арҭ арзаҳалқәа 2024, 2025 шықәсқәа рзы иаарышьҭхьан, аха абыуџьет аԥкрақәа ирыхҟьаны аԥаразоужьра ҟаҵамызт ҳәа радио Sputnik аефир аҿы иҳәеит аусбарҭа ахада Беслан Џьопуа. Арзаҳалқәа рԥаразоужьра 2026 шықәсазы абиуџьет аҟынтәи иҟаҵахоит, уи раԥхьаӡа акәны миллиардбжак инаӡоит.
Хәышықәса рыҩнуҵҟа Аԥсны иазгәаҭоуп 27 хҭыс – зықәра намӡац аӡӷабцәеи ахацәеи аизыҟазаашьа анрыбжьало ҳәа арадио Sputnik иазеиҭалҳәеит ахәыҷқәа рзы аомбудсмен Мактина Џьынџьалԥҳа. Арҭ ахҭысқәа ашәҟәы иҭанагалеит ахәыҷқәеи аҭаацәарақәеи асоциалтә цхыраара рыҭараз амаҵзура, ахәыҷы изинқәа рыхьчара знапы иану и-Аппарат ахьгьы иара убри аҟара дырра ҟаҵоуп, аха аиҳарак урҭ зегьы анонимтә ҟазшьа рымоуп, аофициалтә рзаҳалқәа ыҟаӡам ҳәа лҳәеит лара.
Дырмит Гәлиа иҩны-амузеи аҿы шьаҭанкыла арҽеиратә усурақәа мҩаԥысуеит ҳәа Sputnik иазеиҭалҳәеит амузеи аиҳабы Светлана Қорсаиаԥҳа. Аргылаҩцәа ахыбра актәи аихагылаҿы адашьма ақәгара иаҿуп, ажәытә шьых кыдырхуеит. Апластикатә ԥенџьырқәа амҿлых ԥенџьырқәа рыла ирыԥсахуеит, ауадақәа рыбжьара Гәлиа ихаан иҿаз ашәқәа еиҭашьақәдыргылоит. Ахыбра ахыб ҿыц ақәҵахоит, ахаҿра еиҭашьақәыргылахоит, арԥхареи аҳауеиҭарсреи шьақәыргылахоит. Аиҭашьақәыргыларатә усурақәа раан иазԥхьагәаҭоуп азал хада арҭбаара, аекспозициатә зал ҿыц аартра – уи Жәлар рпоет иҭаацәа ирызкхоит.
Жәларбжьаратәи аҿар рфестиваль ахь аҽҭаҩра аартуп. Иара мҩаԥгахоит Екатеринбург цәыббрамзазы, 190 тәыла рҟынтәи 10-нызқьҩык рҟынӡа ауааԥсыра алахәхоит. Афестиваль еиднакылоит арҿиаратә усхкқәа, аҳәынҭқарратә напхгара, аҭҵаарадырреи атехникеи, аспорт, анаплакра, аинформациатә хархәагақәа, асоциалтә усхк иреиӷьу ахаҭарнакцәа, урҭ рыбжьара иҟалоит Аԥсны ахаҭарнакцәагьы. Уи адагьы, раԥхьаӡа акәны ҳреспублика афестиваль апрограмма иахәҭакхоит. Зықьҩык рҟынӡа алахәылацәа Аԥсни Урыстәыла 30 региони ирҭаауеит.