Бадра Гәынба Урыстәыла адәныҟатәи аусқәа рминистр Сергеи Лавров Адипломатиатә усзуҩы имш идиныҳәалеит. Аԥсны ахада иазгәеиҭеит, адунеи зегьы аҟны урыстәылатәи адипломатиатә маҵзура уи атрадициа бзиақәеи азанааҭтә школи аҳаҭыр ду шрымоу. "Аглобалтә трансформациақәа имариам рҭагылазаашьақәа раан урыстәылатәи адипломатцәа аҩаӡарақәа зегьы рҿы апринципра ҳараки аҭакԥхықәреи аадырԥшуеит, Урыстәыла амилаҭтә интересқәа инеиԥынкыланы гәрахаҵарыла ирыхьчоит, адунеитә аренаҿы уи апозициақәа дырӷәӷәоит", — ҳәа аҳәоит атекст аҿы.
Аҟәа аурыс поет ду ибаҟа аҿаԥхьа имҩаԥысит "Пушкинтәи аԥхьарақәа". Ашәҭқәа анышьҭарҵа ашьҭахь, аҵаҩцәа аклассикатә поет ирҿиамҭақәа рҟынтәи ацыԥҵәахақәа ирыԥхьеит. "Пушкин шәиԥхьала, избанзар иара дпоет дуӡӡоуп, уи шәгәы-шәыԥсы зегьы ианыруеит. XIX - XXI ашәышықәсақәа рзы еиԥш апоетцәа зегьы Пушкин иҩымҭақәа рахь рхы дырхоит", — лҳәеит Аԥсны иҟоу Россотрудничество аусзуҩ Наталиа Каиун, аҵаҩцәа рахь ажәахә ҟаҵо. Аусмҩаԥгатә еиҿыркааит Аԥсны иҟоу Россотрудничество аусбарҭеи Москватәи Пушкин ихьӡ зху аҩбатәи абжьаратә школи рыцхыраарала.
75 шықәса раԥхьа, жәабранмза 10 1951 шықәса рзы диит аԥснытәи аспортсмен, ақәԥаҩ, СССР-и Европеи рчемпион Рашь Хәытаба.Аҷкәын атлетикатә ҟазшьала деиҿартәан, азыҟаҵаҩцәа ирласны дгәарҭеит, дук мырҵыкәа аҟәатәи "Динамо" далахәны аренаҿы ақәҿиарақәа ааирԥшуа далагеит. 1981 шықәсазы Улан-Уде Хәытаба Аслан Хадарцев дииааит, 100 кьылак рҟынӡа зыкапан ыҟоу рыбжьара СССР дачемпионхеит. 1982 шықәсазы, Европа Ачемпионат аҿы Асовет Еидгыла ахьӡала иқәгылараан, афиналтә еиндаҭлараҿы анемец спортсмен Уве Ноиперт дииааит. Аԥснытәи аспортсмен аиааира иигаз адагьы ачемпионат иреиӷьу ақәԥаҩ ҳәа далкаан.
Аԥсуа ҵарауаҩ, аполитик Валери Кәарҷиа иахьа 80 шықәса ихыҵра азгәеиҭоит. Аҭҵаарадыррахь Валери Кәарҷиа имҩа хацыркын 1960-тәи ашықәсқәа рынҵәамҭазы, ари аусхк аганахь ала иусураан аԥсуа бызшәеи атопонимикеи рыҭҵаараҿы, жәытәнатә аахыс ашьхақәеи, акаҵәарақәеи, аӡиасқәеи рыхьӡқәа реиқәырхараҿы илагала дууп. Аҭҵаарадырра инаваргыланы Кәарҷиа активла далахәын атәыла ауаажәларра-политикатә ԥсҭазаара. Аԥсуа ҳәынҭқарра ауасхыр азышьҭазҵаз "Ахьтәы Парламент" далахәын, уи ашьҭахь даҽа хынтә депутатс далырххьан, аҵыхәтәан — 2017-2022 шықәсқәа рзы, Апарламент аиҳабыс дыҟан.