Урыстәылатәи адипломат Дмитри Вишерниови иԥшәмаԥҳәыс Ольгеи ргәаладыршәеит Аҟәа. Урыстәыла Ацҳаражәҳәарҭаҿы икыду амемориалтә ӷәы аҿаԥхьа ашәҭқәа шьҭарҵеит Аԥсны адәныҟатәи аусқәа рминистр Олег Барцыци адипломатиатә хаҭарнакра аиҳабы Михаил Шургалини. Шургалин. Иара иҳәеит ауаҩшьра ҟазҵаз Қырҭтәыла аҵакыраҿы иҽшиҵәахыз, адипломатцәа ирылшо зегь шыҟарҵо урҭ аҭакԥхықәра раҵаркразы.
Урыстәылатәи адипломатиа Аԥсны жәларбжьаратәи азхаҵара арҭбааразы ароль ду нанагӡоит ҳәа иҳәеит ареспублика адәныҟатәи аусқәа рминистр Олег Барцыц. Иара Ацҳаражәҳәарҭа аусзуҩцәа Адипломатиатә усзуҩы имш рыдиныҳәалеит."Ари астратегиатә еидгылареи, апартниорреи, аиҩызареи, иара убас ҳреспубликаҿы имҩаԥысуа апроцессқәа даара игәцаракны рызнеиреи ирҿырԥш иашаҵәҟьоуп", — ҳәа азгәеиҭеит иара. Адипломат ҭабуп ҳәа реиҳәеит урыстәылатәи апартниорцәа, Сергеи Лавров зхадараҿы дыҟоу УА АдәАР аколлектив, Аԥсны иҟоу Урыстәыла Ацҳаражәҳәарҭа аусеицуреи аиҩызареи шьаҭас измоу ҩ-ганктәи апартниортә еизыҟазаашьақәа рырҿиаразы.
Бадра Гәынба Аԥсны иҟоу Урыстәыла ацҳаражәҳәаҩ Михаил Шургалини адипломатиатә хаҭарнакра аколлективи Адипломатиатә усзуҩы имш рыдиныҳәалеит. Иара иазгәеиҭеит аҩ-тәылак рыбжьара аидгыларатә еизыҟазаашьақәа реиқәырхареи рырҿиареи рзы Ацҳаражәҳәарҭа есыҽнытәи аусура. "Урыстәыла Афедерациеи ҳареи иҷыдоу аизыҟазаашьақәа ҳабжьаҵара ҳтәылазы аԥыжәара аман иҟоуп. Уи амҩа ԥхьаҟагьы ацәхьамҵра ҳгәы иҭоуп. Иара Аԥсны ажәлар ринтересқәа ирықәшәоит, Урыстәылатәи Афедерациа аинтересқәа ирықәшәоит", — ҳәа азгәеиҭеит атәыла ахада.
Аџьынџьтәылатә еибашьра Ду аветеран, Аԥсны инхо Алықьса Лашәриа 101 шықәса ихыҵит. Иара хатәгәаԥхарала афронт ахь дцеит. Кавказнҭыҵтәи арратә округ аҿы 414-тәи ахысратә дивизиа 802-тәи ахысратә полк ателефонистс дыҟан. Лашәриа иҩызцәа дрыцны Берлинынӡа днеит, Реихстаг аҭӡамц аҿы аҩыра аанижьит. Аибашьра ашьҭахьтәи ашықәсқәа рзы Алықьса Лашәриа Аҟәаҟа диасит, акондитертә фабрикаҿы аусура далагеит. Иара иахьагьы Аԥсны аҳҭнықалақь аҿы ихәыҷқәеи имоҭацәеи дрыцынхоит.