"Имеретинтәи акурорт" уажәшьҭа "Сириус" ахьӡуп.Урыстәыла Аиҳабыра ақәҵара инақәыршәаны аихамҩа аангыларҭа ахьӡ ԥсахуп.Уажәшьҭа афымцадәыӷба "Диоскуриа" ныҟәалоит "Сириус"— Аҟәа ахырхарҭала.Уи ҽнак ҩынтә ибжьоуп, 2025 шықәса лаҵарамза инаркны 2026 шықәса алагамҭанӡа 155 нызқьҩык апассаџьырцәа мҩаннагеит
Арҩышьыгатә маҭәашьар «метадон» имхын Очамчыра араион Акәаскьа ақыҭан инхо Емырхба Алхас Иуан- иԥа .Аоперативтә усмҩаԥгатәқәа нарыгӡеит Афонҿыцтәи амилициа аҟәша аусзуҩцәа. Ашьаус аҳәаақәа ирҭагӡаны Ареспублика ашьаустә закәанеидкыла 1 ахәҭа 223 тәи ахәҭаҷ ала ихацырку ашьаусҭҵаара мҩаҧнагоит Гәдоуҭа араион аҩныҵҟатәи аусқәа русбарҭа аусеилыргара агәыҧ.- Хыхь зыӡбахә ҳәоу атәылауаа аара ирыдыу изыхәҭоу Аӡбарҭақәа ишьақәдыргылоит. Ауысӡбаратә актқәа азакәанҧҵара инақәыршәаны Аӡбарҭа асаит аҟны иркьыҧхьуеит.
Александр Чачба-Шервашиӡеи аҩбатәи иҧшәмаԥҳәыс Наталиа Бутковскаиеи иареи рысалам шәҟәқәа Париж аукцион аҿы иаахәоуп.Урҭ ааихәеит асахьаҭыхҩы ихьӡ зху Афонд аиҳабы Виачеслав Чрыгба.Зынӡа асалам шәҟәқәа 10 ыҟоуп, урҭ Чачба-Шервашиӡе иҩны-амузеи аколлекциа иахәҭакхоит. Х-шәҟәык асахьаҭыхҩы иҩыза, афранцыз еиҭагаҩ Дени Рош изынархоуп, хәба — Бутковскаиа лҟынтәи Рош изынашьҭыз роуп, ҩ-шәҟәык арыцхә арбаӡам."Хәы змаӡам аҭынха схарџьқәа рыла иаасхәоит, аха издыруада аӡәы дазҿлымҳахар, ҳџьынџьуаҩ ду иҭынха аиҭашьақәыргылараҿы ацхыраара ҟаиҵар", — иҩуеит Чрыгба.
Москватәи амузеи дуқәа Аԥсныҟа ашәҟәқәа аарышьҭит.Урҭ иреиоуоуп Акино амузеи, Пушкин ихьӡ зху аҳәынҭмузеи, Бахрушинтәи атеатртә музеи, Даль ихьӡ зху Урыстәыла алитературатә-ҭоурых музеи рҭыжьымҭақәа ҳәа аанацҳауеит Урыстәыла акультура аминистрра. Асиаҿы иҟоуп Урыстәыла ихадоу амузеиқәа рколлекциақәеи рфондқәеи ирызку амҩақәҵагақәа, аенциклопедиақәа, акаталогқәа уҳәа ашәҟәқәа рацәаны. Урҭ Иван Папасқьыр ихьӡ зху Амилаҭтә библиотекеи Камантәи аберҭыԥ абиблиотекеи ирырҭеит.
Аԥснынтәи аурыс бызшәеи алитературеи рырҵаҩцәа Петербург имҩаԥысуа "Аӡынтәи ашкол" иалахәуп.Ареспублика ахьӡала иқәгылоит Гагратәи алицеи-интернати Очамчыратәи аҩбатәи ашколи рҟынтәи арҵаҩцәа Есма Паразиаԥҳаи Софиа Семилетовеи ҳәа аанацҳауеит Аԥсны аҵара аминистрра.Апроект еиднакылеит Аԥсны, Ермантәыла, Беларусь, Ҟазахсҭан, Аахыҵ Уаԥстәыла рҟынтәи 45-ҩык арҵаҩцәа. Урҭ ашколхәыҷқәа аурыс бызшәа аҵара ралархәразы иҿыцу азнеишьақәа ҭырҵаауеит, алитература аурокқәа аинтерактивтә ҟазшьа рыманы ишыҟаҵатәу еилыркаауеит.