Иахьа 16 шықәса ҵит аԥсуа жәлар дрыԥхеижьҭеи, ҳаамҭазтәи Аԥсуа ҳәынҭқарра ашьаҭаркҩы, амилаҭтә фырхаҵа, Аԥсны раԥхьатәи ахада Владислав Арӡынба. Иара иԥсҭазаара далҵит хәажәкыра 4, 2010 шықәсазы.Аԥсны аҭоурых аҟны Владислав Арӡынба аҭыԥ ҷыда ааникылоит. Иара аполитика ду ахь дааит 80-тәи ашықәсқәа рынҵәамҭазы, 1990 шықәсазы Аԥсны Иреиҳаӡоу Асовет Ахантәаҩыс далырхоит. Аԥсны Аџьынџьтәылатә еибашьраан Владислав Арӡынба атәыла Арбџьармчқәа рхадараҿы дгылеит, ижәлар ражәеи рыгәрагареи иманы. Уи иабзоураны аӷа ҳаԥсадгьыл дықәцаны иган Аиааира.
Аԥсны аҩбатәи ахада Сергеи Уасил-иԥа Багаԥшь диит хәажәкыра 4 1949 шықәсазы Аҟәа. Иара наунагӡа иԥсадгьыл аҭоурых аҿы даанхоит Аԥсны ахьыԥшымра азхаҵара дасимволны.2005 шықәсазы Сергеи Багаԥшь Аԥсны ахадас далхын атәылаҿы ауаажәларра-политикатә еибырххарақәа раамҭазы. Усҟан иара илшеит аҭагылазаашьа аҭышәнартәалара. 2009 шықәсазы Сергеи Багаԥшь Аԥсны ахадас деиҭалхын.Сергеи Багаԥшь иаамҭаӡамкәан иԥсҭазаара далҵит 2011 шықәса лаҵарамза 29 рзы. Анышә дамадоуп иқыҭа гәакьа Џьгьарда.
Хәажәкыра 4 — раԥхьатәи ахада Владислав Арӡынба иԥсҭазаара даналҵыз амши аҩбатәи ахада Сергеи Багаԥшь даниз амши — Аԥсны иҿыцӡоу аҭоурых аҿы иҷыдоу мшуп ҳәа ахиҳәааит атәыла ахада Бадра Гәынба."Аҭоурых ҩ-хьӡык мшык аҿы еиднакылазшәа иҟоуп — аамҭақәа рышьҭреимдареи Аԥсны алахьынҵаҿы иналукааша ҳҳәынҭқарратә усзуҩцәа рлагалеи инаҵшьны иазгәанаҭарц азы", — иҳәеит иара."Арҭ арыцхәқәа реиқәшәара – ҳаԥхьагылаҩ Арӡынба иԥсҭазаара алҵреи, Ҳхьыԥшымра зыхьӡ адҳәалоу Багаԥшь имширеи — ҳажәлар ҩ-епохак рсимволтә еимадара акәны ирыдыркылоит. Ари гәаларшәагоуп, зыԥсҭазаара ажәлари аҳәынҭқарреи рымаҵ аура иазызкыз ауаа рымчала Аԥсны аҭоурых шаԥырҵоз азы", — азгәеиҭеит Бадра Гәынба.
Герман Каҷараа Тҟәарчал араион ахадас дшьақәырӷәӷәоуп. Иара икандидатура аҭыԥантәи Аизара аилатәараҿы еицҿакны ишьақәырӷәӷәан ҳәа рҳәеит араион ахадара апресс-маҵзураҿы.
Алиас Аҩӡба апроект Адырра.Апремиа 2025 аҟны аиааира игеит.Аҩӡба "Аԥсадгьыл ахьчаҩцәа рфырхаҵарақәа ргәалашәара аиқәырхараҿы илагалазы" аноминациаҿы далкаан."Сара сыԥсҭазаараҿы акыр сылсыршазар, уи уеизгьы-уеизгьы абзиабара сылазҵаз сыжәлар ирыбзоуроуп. Убри аҟнытә, азин сышәҭозар, ари аҳамҭа Сыԥсадгьыл иқәынхо сыжәлар хәыҷы, милаҭрацәала еиларсу Аԥсны жәлар ирзыскуеит", — иҳәеит Аҩӡба.
526 799 мааҭ арҳаит аспектакль "Афырхацәаҵәҟьақәа" ҳәа Sputnik иазеиҭалҳәеит апроект "Ҳәаа змам аҟазара" автор Анна Савилова.Згәабзиарала зылшарақәа ԥку ахәыҷқәа злахәыз аспектакль шьаҭас иаман ан иеиҭалҳәаз лыҷкәын Давид иҭоурых. Иара згәабзиарала зылшарақәа ԥку хәыҷуп, ашкол аҿы арҵаҩцәа рымч иқәхом. Ақәыргыламҭа иалахәын 40-ҩык инареиҳаны ахәыҷқәа. Аԥарақәа зегьы афонд "Ашана"хылаԥшра знаҭо ахәыҷқәа ирзырхахоит.