30 рҟынӡа аҳәаанырцәтәи адронқәа Аԥсны ажәҩанҵакыраҿы иазгәаҭан хәажәкыра 4 рзы. "Иацы адронқәа зеиԥш ҟамлацыз хыԥхьаӡара рацәала рхархәара ҳаниеит", — ҳәа абрифинг аан инаҵшьны иазгәеиҭеит Арбџьармчқәеи Аҳаирхьчаратә мчрақәеи ркомандаҟаҵаҩ, аинрал-леитенант Адгәыр Гәымба. Адронқәа зегьы шамахамзар Аԥсни Урыстәылеи рҳаирхьчаратә мчқәа русеицурала иҭархан, урҭ 11 еиланхарҭа рҿы икаҳаит ҳәа азгәеиҭеит иара. Гәымба иҳәеит ари раԥхьатәи хҭысым ҳәа – уаанӡа аруаа мышкы аҩнуҵҟала 5-7 дрон анкарыжьуаз ыҟан имыраргамамкәа, ашәарақәа аҭыԥ рмоурц. Иара аҭагылазаашьа ахылаԥшра ауҭо иҟоуп ҳәа ахиҳәааит, инаҵшьны иазгәеиҭеит адронқәа Аԥсны ажәлара хықәкыс ишрымамыз, аха аԥшыхәра хықәкыс ирымазар шалшоз.
Аԥсни Урыстәылеи рҳәаа абжьааԥнеиԥш аус ауеит ҳәа Sputnik иазеиҭеиҳәеит Аҳәынҭқарратә шәарҭадаратә маҵзура Аҳәаахьчаратә усбарҭа аиҳабы Рустам Латипов. Хәажәкыра хәба ауха изныкымкәан аҳәаа адыркит Шәача адронқәа ржәылараз иҟаз ашәарҭареи аҳаирхьчаратә хархәагақәа русуреи инамаданы.
Аԥсны аҳәынҭқарратә медусҳәарҭақәа рзы ахәшәқәеи амедицинатә аалыҵқәеи раахәаразы аусбарҭатә хықәкытә программа шьақәырӷәӷәоуп. 2026 шықәсазы уи иазоужьхоит 250 млн мааҭ ҳәа Аминистрцәа реилазаара аилатәараҿы адырра ҟаиҵеит агәабзиарахьчара аминистр Едуард Быҭәба. Иара иажәақәа рыла, апрограммаҿы ҷыдала ахшыҩзышьҭра рыҭоуп: амбулатортә хәышәтәра иахысуа аневрологиатә чымазарақәа змоу ахәыҷқәа, зцәа зтәым аҳәса, ашьақар чымазара змоу, зеиуа маҷу ачымазарақәа змоу, акьыбачымазарақәа змоу.
Ишьақәырӷәӷәоуп 2026 шықәсазтәи аусбарҭатә хықәкытә программа "Аԥсны Аџьынџьтәылатә еибашьра аинвалидцәа рмедицинатә реабилитациа". Аӡбра рыдыркылеит Аминистрцәа реилазаара аилатәараҟны. Апрограмма ахықәкы – аинвалидцәа рреабилитациеи урҭ ауаажәларра рылагалареи, Ареабилитациатә центр апротезқәа рыҟаҵаразы амедхархәагақәеи аныхтәқәеи рыла аиқәыршәареи. Ари аус иазоужьуп 6 млн мааҭ.