2025 шықәсазы Очамчыра араион абиуџьет 91% рыла инагӡан.Иҳаҩсыз ашықәсазтәи аихшьаалақәа ҟаиҵеит араион ахада Алхас Кациа, аҳәынҭқарра ахада Бадра Гәынбеи уи ихаҭыԥуаҩ Беслан Бигәааи злахәны имҩаԥысуа аилатәараҿы. Агәабзиарахьчара иазоурыжьит — 42 млн мааҭ, акультура аҿиаразы — 33 млн мааҭ, аҿартә политикеи аспорти — 10 млн мааҭ.Миллион мааҭ рҟынӡа ауааԥсыра асоциалтә цхыраареи, х-миллионк инареиҳаны араион ауааԥсыра Аԥсны анҭыҵ амедицинатә цхыраара рыҭара ирзырхан.
Аԥсны абылтәы ахкқәак рыхәԥса лаҟәит. Ҳазҭоу аамҭазы АИ-92 абензин литрк 52-57 мааҭ иаԥсоуп, АИ-95 — 72-77 мааҭ, адизель — 55-59 мааҭ.Абылтәы иахәҭоу еизакны аахәара алыршахеит атәыла ахада Бадра Гәынбеи Урыстәыла ахада Иусбарҭа ахада актәи ихаҭыԥуаҩ Сергеи Кириенкои ирыбжьарҵаз аиқәшаҳаҭрақәа ирыбзоураны.Аԥснытәи аџьармыкьа алахәылацәа рзы еиҟароу, иаарту аҭагылазаашьақәа раԥҵара иазынархоу аусмҩаԥгатәқәа рыхәҭак нагӡоуп, егьырҭ аамҭа кьаҿк иалагӡаны анагӡара азгәаҭоуп ҳәа инаҵшьны иазгәеиҭеит аилахәыра "АЗИД" ахантәаҩы Адамыр Габуниа. Абензин азымхара иахҟьаны, арҭ аҳақәа рбензинҭаҭәарҭақәа аамҭақәак рзы иаркын.
Аҟәатәи 13-тәи абжьаратә школ аҿы аҵаратә процесс аанкылоушәа иҟаз ажәабжь иашаӡам ҳәа арадио Sputnik аефир аҿы илҳәеит ашкол аиҳабы Лариса Кәыбрааԥҳа. "Ашкол аҿы мышкгьы, сааҭкгьы аҵаратә процесс аанаҳамкылацт. Еилкаау усуп ахыбра аиҭашьақәыргылара шаҭаху. Аха аҵаҩцәеи арҵаҩратә еилазаареи ргәабзаиара ашәарҭара иҭазыргыло аҭагылазаашьа ыҟам", — лҳәеит Кәыбрааԥҳа.Лара лажәақәа рыла, асоциалтә ҳақәа рҿы аларҵәара змоуз ашкол афотосахьақәа аԥшьбатәи аихагыла аҟынтәи ауп. Уаҟа аҵаратә процесс зынӡа имҩаԥысӡом. Иахьатәи аамҭаз ашкол аҿы аҵара рҵоит 72-ҩык аҵаҩцәа.
Кәҭол ақыҭан инхо Саид Коӷониа аӷьычраз ахара идҵоуп.Ацәгьоура ҟалеит ҵыԥх аԥхынразы Аҟәатәи аџьармыкьа азааигәара. Коӷониа Туркменистантәи хаҵеи-ԥҳәыси 10 000 мааҭ ирҭарц рыдиҵеит.Дара мап аницәырк ашьҭахь, рмашьына ԥҽны дҭалан аԥарақәеи аҩычагақәеи зҭаз аԥҳәыс лшәыра ӷьычны дыбналеит. Иааизакны ироуз ааха 118 нызқь мааҭи, 30 аԥсари, 25 доллари ҟалеит ҳәа аанацҳауеит Аҩнуҵҟатәи аусқәа рминистрра.Ԥыҭрак ашьҭахь Коӷониа дааныркылеит, уажәы дҭакуп.