Урыстәыла Ауаажәларратә палата Аԥсны имҩаԥысуаз Аграждантә форум алахәылацәа адныҳәаларатә шәҟәы рзаанашьҭит. Ашәҟәы даԥхьеит Урыстәыла АП алахәыла Аигун Магомедов. "Афорум, Аԥсны ауаажәларратә ԥсҭазааразы иналукааша хҭысны ишыҟало, аграждантә уаажәларра рышәреи, амчреи дареи гәаартыла реицәажәаразы алшарақәеи рышьақәырӷәӷәара ишазкхо ҩашьом", — ҳәа аҳәоит Урыстәыла АП амаӡаныҟәгаҩ Лидиа Михеева лыхьӡала иаашьҭу ашәҟәаҿы.Афорум атема хадақәа шаҳаҭра руеит аиҿкааҩцәа ауаажәларра рҿаԥхьа иқәгылоу, актуалра злоу аҭахрақәа инарҵауланы ишеилыркаауа, урҭ рыӡбара ишашьҭоу ҳәа азгәаҭоуп ашәҟәаҿы.
Иахьатәи анапхгараҭаратә система — ажәит, алҵшәа ацәыӡит ҳәа азгәеиҭеит Аԥсны Ауаажәларратә палата алахәыла Сократ Џьынџьал. "Иаагап, Апарламент адепутатцәа ралхрақәа реиҿкаара мацарагьы. Ҳара ҳҿы ахархәара змоу амажоритартә система, аусдырцәа аӡәырҩы ргәаанагарала, иажәит, апартиатә еизышәоу асистемахь аиасра аҭахны иҟоуп", — ҳәа азгәеиҭеит иара.Иара убас, ииашахон Аиҳабыра реиҿкаараҿы Апарламент алахәхара, уи адепутатцәа рҭакԥхықәра ҳаранакуеит ҳәа азиԥхьаӡоит Ауаажәларратә палата алахәыла.
Аԥсны Ауаажәларратә палата еиҿнакааз Аграждантә форум алахәылацәа 2036 шықәсанӡа адемографиатә ҿиараз Амилаҭтә программа аус адулареи ашьақәырӷәӷәареи мҩаԥгазарц ажәалагалақәа ҟарҵеит. Арепатриациазы аамҭакьаҿлатәи абжьараамҭалатәи Аҳәынҭқарратә программақәа аус рыдулара рыдыргалеит. Аграждантә форум аихшьаалақәа рыла, ажәалагала ҟанаҵеит ашколқәа рҿы агроклассқәеи амҩақәҵаратә системақәеи аԥҵазарц. Аихшьаалатә резолиуциа даԥхьеит Ауаажәларратә палата амаӡаныҟәгаҩ Гәыли Кьычԥҳа.
Аурыс-аԥсуа еидгыларатә еизыҟазаашьақәа ԥхьаҟа ицо адинамика рныԥшуеит лҳәеит Урыстәыла АәдА рминистрра аофициалтә хаҭарнак Мариа Захарова."Аҵыхәтәантәи ашықәс иалагӡаны агуманитартә, аекономикатә, еиуеиԥшым егьырҭ ахырхарҭақәа рҿы еицырзыфеидоу апроектқәа рацәаны инагӡоуп. Аҟәатәи аҳаирбаӷәаза аусура аиҭахацыркра ,Адлер инаркны Аҟәанӡа иманшәалоу афымцадәыӷбақәа рныҟәара алыршара , еиҭашьақәыргылан амемориалтә обиектқәа ҳәа еиқәылыԥхьаӡеит Захарова. Илҳәеит Урыстәыла ацхыраарала Аԥсны ишынарыгӡо 2026-2030 шықәсқәа рызтәи асоциал-економикатә ҿиара аҳәынҭқарратә программа ҿыц, 2026-2028 шықәсқәа рызтәи аҿиара ацхрааразы аинвестициатә программа.