33 шықәса раԥхьа март 15-16 рзы Аҟәа аӷа иалцараз Гәымсҭа ахырхарҭаҟынтә имҩаԥгаз ажәылара, ацәыӡ дуқәа зцыз акәны ҳҭоурых иазаанхоит. Арҭ амшқәа рзы есышықәса рҩызцәа ргәаладыршәарц еизоит Аџьынџьтәылатә еибашьра аветеранцәа. Ишымҩаԥгаз уи ажәылара, иарбан хыдҵақәоу ирзықәыргылаз ҳаибашьцәа, иабанӡаӡрыжәи уи аԥсадгьыл ахьчаҩцәа, ироуз ацәыӡқәа, ахьаа ӷәӷәа излаиааиз ? Абарҭқәа ҳрылацәажәарц астудиахь дааҳаԥхьеит Аԥсны Аџьынџьтәылатә еибашьра аветеран Анзор Шәлымба.
Аицәажәара аудиофаил аҟны хыхь.
1993 шықәса хәажәкыра 15 руха аполковник Сергеи Дбар напхгара зиҭоз аԥсуа еибашьцәа Гәымсҭа аӡы ирны мҽхакыҭбаалатәи ажәылара иалагеит. Асааҭ 00:45 рзы архәҭақәа аӷа ихырӷәӷәарҭақәа ҳауалеи бзарбзанлеи амца рыжәҵан, анаҩс ашьаҟауаа ажәылара иалагеит еиуеиԥшым ахырхарҭақәа рыла. Аха амчқәа реиҟарамра иахҟьаны ажәылара лыҵшәадахеит.Хәажәкыра 17-18 рзы ишьаарҵәыраз аидысларақәа рышьҭахь архәҭақәа хьамҵыр ада ԥсыхәа рмоуӡеит. Усҟан иҭахеит 222-а аԥсуа еибашьцәа, 23-ҩык хабарда ибжьаӡит. Аҭоурых аҿы ари ажәылара илҵшәадахаз ҳәа ишырԥхьаӡогьы, аибашьцәа ргәаанагарала, уи иалҵшәахеит Аиааира аазгаз аҵыхәтәантәи цәыббратәи ажәылара.