17 млрд мааҭ инареиҳаны ареспубликатә биуџьет иалагалан 2025 шықәсазы.Уи аплантә рбагақәа раасҭа 312 млн рыла еиҳауп ҳәа аанацҳауеит Аминистрцәа реилазаара. Ахашәалахәқәа рзы абиуџьет анагӡара иартәеит — 101,9 %. 2024 шықәсазтәи арбагақәа ирҿырԥшны ахашәалахәқәа 5,4 млрд мааҭ рыла еизҳаит.
Иҳаҩсыз ҩышықәса ирылагӡаны Аԥсны ареспубликатә биуџьет ахашәалахәы еизҳаит.2024 шықәсазы атәыла ахатәы хашәалахәы 7,9 млрд. мааҭ ыҟазҭгьы, 2025 шықәсазы уи 8,3 млрд. мааҭ рҟынӡа еизҳаит. Еизҳаит 802,9 млн. мааҭ рыла, мамзаргьы 10,2%. Урыстәылатәи афинанстә цхыраара амҽхакгьы акыр иазҳаит. 2024 шықәсазы Урыстәылантәи 3,7 млрд. мааҭ аиуит, 2025 шықәсазы уи 8,3 млрд. мааҭ инаӡеит.
Урыстәылатәи аҳақьымцәа акурорттә аамҭахәҭазы Очамчыратәи араионтә хәышәтәырҭа хада аҿы рколлегацәа ирыцхраауеит, абри атәы арадио Sputnik аҿы еиҭеиҳәеит ахәышәтәырҭа аҳақьым хада Лаша Какалиа. "Ахирургцәеи атерапевтцәеи акурорттә аамҭазы ҳусуҩцәа ирыцхраалоит. Урҭ ауаа рыдыркылалоит, уахынлатәи аҷаԥшьарақәа ргаргьы ҟалоит", — азгәеиҭеит иара. Какалиа иажәақәа рыла, ахәышәтәырҭа анапхгара еиҳа зҭахра ыҟоу аспециалистцәа рсиа шьақәдыргылеит.
Афымцатә цәаҳәақәа ирықәу ақәыӷәӷәарақәа раԥыхразы аусурақәа иахьагьы ирыцҵоуп. Урҭ мҩаԥысуеит астанциа маҷ "Бзыԥ", Гәдоуҭа араионаҿы иҟоу астанциа маҷқәа, ацәаҳәа "Шьешьелеҭ-1" ҳәа аанацҳауеит Аенергетика аминистрра. Аусурақәа ирыхҟьаны лашарада иҟазаауеит Гагра, Гәдоуҭа Очамчыра, Гәылрыԥшь араионқәа, иара убас Аҟәа ақалақь мрагыларатәи ахәҭа.
Баӷбаран ақыҭан ахадара ахыбра ҿыц дыргылоит Ажәытә хыбра ԥхасҭахеит, аусзуҩцәа рзы иахәҭоу аусуратә ҭагылазаашьақәа ыҟамызт ҳәа аанацҳауеит Гәылрыԥшь араион ахадара.Иахьазы ахаҳәҟьаԥс шьҭарҵахьеит, аҭӡамцқәа рышәреи ахыркәшаратә усурақәеи азгәаҭоуп иҳәеит анхарҭа-коммуналтә усбарҭа аиҳабы Ҭемыр Начҟьебиа.Аргыларақәа хыркәшахоит 10-12 мшы рыла.
Ахш ӡхыҽҽаҟынӡа амҩа рыцқьоуп ҳәа рҳәеит Риҵатәи амилаҭтә парк аҿы. Абнатә нхамҩа аусзуҩцәа асы, икажьыз аҵлақәа, ахаҳәқәа ықәыргеит. Ауадҳараҟа амҩа аартра иаздырхиоит, амза анҵәамҭазы аартра азгәаҭоуп.