Лаҵарамза ҩба рзы Аԥсны Афырхаҵа, аинрал -леитенант Сергеи Дбар диижьҭеи 80 шықәса аҵразы Гәдоуҭеи Аҟәеи агәалашәаратә уснагӡатәқәа еиҿкаахоит. Сергеи Платон-иԥа иуаҩышьа, Аԥсны жәлар Рџьынџьтәылатә еибашьраҟны ихы шааирԥшыз игәалаиршәаразы ҳаҽимаадеит аибашьра аветеран, Аԥсны Афырхаҵа, аиубилеитә рыцхә аиҿкааразы аҳәынҭқарратә комиссиа алахәыла Фазлыбеи Аҩӡба.
Аицәажәара аудиофаил аҟны хыхь.
Сергеи Дбар диит лаҵара 2 1946 шықәсазы Мгәыӡырхәа ақыҭан. Аинрал-леитенант, Аԥсны Афырхаҵа, иԥсҭазаара даналҵ ашьҭахь "Ахьӡ-Аԥша" аорден I -тәи аҩаӡара ианаршьеит. Аԥсны Аџьынџьтәылатә еибашьра 1992-1993 шықәсқәа рзы Бзыԥтәи ахыхьчаратә цәаҳәа аштаб аиҳабыс, Гәымсҭатәи афронт адҵаҟаҵаҩс дыҟан. Сергеи Платон-иԥа Атәылахьчара аминистр ихаҭыԥуаҩс аус иуан 1993 - 1996 шықәсқәа рзы, арратә зҵаарақәа рзы аҳәынҭқарра ахада иабжьгаҩс дыҟан 1996 - 2002 шықәсанӡа. 2002 шықәсазы Апарламент ахь далхын, Жәлар Реизара ахантәаҩы ихаҭыԥуаҩс дыҟан. 1999 шықәса инаркны — аветеранцәа руаажәларратә еиҿкаара "Амцахара" ахантәаҩыс аус иуан. Сергеи Дбар иԥсҭазаара далҵит 2002 шықәсазы ԥхынгәы 27 рзы.