Гагра афымцаҳақәа рырҿыцреи абонентцәа афымцамчԥхьаӡагақәа рыла реиқәыршәареи рзы аусура хацыркуп Абазгаа рымҩаду аҿы аспециалистцәа зымчхара ӷәӷәоу афымцамҩангагатә цәаҳәақәа шьҭарҵоит, аҩнеихагылақәа рыҩналарҭақәа рҿы зҭагылазаашьа бааԥсны икыдыз амаругақәа рыԥсахуеит.Аенергетика аминистрра излаанацҳауа ала, Аҟәагьы аусурақәа шцац ицоит — ақалақь агәҭаны, Аҳабла ҿыц, Алашарбага аҳабла ахәҭак рҟны. Аҳаблақәа Синопи Турбазеи рҿы аусурақәа хыркәшоуп.
Агәабзиаратә ԥкырақәа змоу ауаа рзы аинтерактивтә хсаала аус адырулеит Аԥсны . Абри атәы Sputnik иазеиҭеиҳәеит Ассоциациа "Инва-Содействие" анапхгаҩы Алхас Ҭхагушев.Уажәшьҭа згәабзиара уашәшәыроу ауаа ари ахсаала ахархәарала еилыркаар рылшоит ԥынгылада изҭаар ауа аобиектқәа. Актәи аетапқәа раан иадырбоит ахыбрақәеи ауаажәларратә ҵакырақәеи раудит ззыҟаҵоу 200 иреиҵамкәа аобиектқәа, иара убас адәахьтәи анавигациа аелементқәа змоу апилоттә проектқәа хԥа нарыгӡоит.
Гәдоуҭа араион школқәак рҟны аиҭашьақәыргыларатә усурақәа мҩаԥгахоит ҳәа арадио Sputnik аҟны иҳәеит араион аҵараҟәша аиҳабы Адамыр Ҳаразиа.Иара иажәақәа рыла, аусурақәа мҩаԥгахоит Гәдоуҭатәи аҩбатәии ахԥатәии ашколқәа рҟны — уаҟа аҭыӡқәа шәтәуп, аӡцрыҵцарҭақәа ԥсахтәуп, иара убас Гәдоуҭатәи ахәбатәи ашкол аҩбатәи аихагылаҿы ауадақәа ҟаҵатәуп, ашҭаҿы аҵиаақәа еиҭаҳатәуп."Иааидкыланы ҳраион аҟны школк алкааны зегьы рыла ахылаԥшра аҭахуп ҳәа ззысҳәара ҳамаӡам. Школқәак рҟны иҟоу апроблемақәа — џьара хыбк ԥсахтәуп, џьара акттә зал ыҟаӡам, даҽакаҿы аԥенџьырқәа ԥсахтәуп, абарҭқәа азгәаҭаны арҽеиратә усурақәа наҳагӡоит", — иҳәеит иара.
Урыстәылатәи аинформациатә ресурсқәа рҟны Аԥсны иазку аинформациа анҵара — ҳхықәкқәа иреиуоуп иҳәеит АЖР ахантәаҩы Руслан Ҳашыг, Аԥсни Урыстәылеи ажурналистцәа реидгылақәа русеицура арҭбааразы иҟаҵатәу ҳәа игәаанагара дазааҭгыло. Урҭ ирымоу амҽхак аԥсуа журналистцәа рхы иадырхәароуп ҳәа иԥхьаӡоит иара.
Гагра аестакада аҭӡамц аҟны аекспозициа "Аамҭа агалереиа" ақәҭыхра иалагеит.Уи ианылоит фҩык аԥсуа сахьаҭыхыҩцәа — Баҭал Џьапуа, Оҭар Мацхарашьвили, Тариел Амԥар, Асҭанда Ԥкьынԥҳа, Заур Аџьба, Леуарса Быҭәба русумҭақәа-рықәҭыхқәа.Ари апроект "Феникс" аҳәаақәа ирҭагӡаны амонументалтә ҿыханҵа ахьаарԥшу аԥшьбатәи ҭыԥхеит ҳәа Гагра-ТВ иазеиҭеиҳәеит Даниил Семикрас.Иара иазгәеиҭеит даҽа ҩ-сахьак Гагра ашкол аҭӡамцқәа рахь риагара ргәы ишҭоу.