Михаил Мишустин Кавказтәи аинвестициатә форум аҿы Аԥсны астенд даҭааит. Урыстәыла аԥыза-министр аҳәынҭқарра ахада Бадра Гәынба диԥылеит. Иара ареспублика асоциал-економикатә ҿиара арбага хадақәа ртәы далацәажәеит. Бадра Гәынба иҳәеит шықәсык аԥхьа аҟәатәи аҳаирбаӷәаза шаартыз, 120-нызқьҩык апассаџьырцәа шымҩаныргахьоу. Иара убасгьы аекономика аминистр Ҭеимураз Амқәаб Мишустин изеиҭеиҳәеит Аԥсны ашьхашәҩатә курорт аԥҵаразы аинвестициатә проект атәы.
Аҟәеи Нальчики рыбжьара аҳаиреимадара аусура аларгара иалацәажәеит Кавказтәи аинвестициатә форум аҿы. Аиԥылара рхы аладырхәит аҳәынҭқарра ахада Бадра Гәынбеи Ҟабарада-Балкариа ахада Казбек Кокови ҳәа иҳәеит аԥыза-министр Владимир Делба ТАСС аинтервиу аҭо. "Ҳара ҳақәгәыӷуеит аҳаирԥыррақәа ргеографиа арҭбаара – атуристтә усхк аҿиарагьы уахь иналаҵаны, аизҳара рнаҭап ҳәа. Иҳамаӡам агәаҳәара, ус баша амаршрутқәа рхыԥхьаӡара ҳаррацәап ҳәа. Доусы амаршрутқәа економикала еимадоуп, ишьаҭаркуп афеида аиуразы, ҳәара аҭахума, хра рымазарц", — ҳәа инаҵшьны иазгәеиҭеит Делба.
Аҵасқәеи, ақьабзқәеи, азакәанқәеи аҳәсеи ахәыҷқәеи рыхьчаразы иаку системаны аус рулароуп ҳәа лҳәеит ахәыҷы изинқәа рыхьчаразы азинмчы змоу Мактина Џьынџьалԥҳа арадио Sputnik аефир аҟны. "Аҭаацәара-бзазаратә қәымчразы" азакәан аԥсуа ԥсҭазаашьа иаҿагылоит ҳәа ҳтәылауаа џьоукы ргәаанагара мцуп ҳәа илыԥхьаӡоит лара, избанзар аԥсуа уаажәларраҿы ахаангьы аҳәсеи ахәыҷқәеи рганахьала ақәымчра хьӡы амамызт.
Ашколхәыҷқәа рреспубликатә аолимпиадаҿы 242-ы аиааира ргеит. Урҭ рҟнтә 95-ҩык алагарҭатә классқәа рҵаҩцәа роуп, 147- ҩык — аиҳабыратә классқәа рҵаҩцәа. Аҳамҭақәа ранашьара иазкыз аусмҩаԥгатә мҩаԥысит Иури Воронов ихьӡ зху 3-тәи ашкол аҿы. Аҵара аминистр лхаҭыԥуаҩ Хьыбла Шамԥҳа аиааира згаз дрыдныҳәалеит, урҭ амаҭәарқәа рыла аҳәынҭқарратә ԥышәарақәа рҟнытә рхы ишақәиҭтәхо лҳәеит ҳәа аанацҳауеит "Аԥсныпресс".