Аҟәа имҩаԥысуа Аиааира апарад 700-ҩык инареиҳаны ауаа алахәхоит ҳәа аанацҳауеит Аԥсны Атәылахьчара аминистрра. Архәҭақәа ирылоуп атәылахьчаратә усбарҭа, аҳәынҭқаррахьчаратә усбарҭа, аҳазалхратә еилакы, Аԥсны АҩАР, Аԥсны АҶА, урыстәылатәи арратә база, Аԥсны иҟоу АфШәМ Аҳәаахьчаратә Усбарҭа рхаҭарнакцәа. Ашьаҟауаа гәырӷьарала еишьҭагылан рымҩасра иалагоит асааҭ 11:00 рзы Ахақәиҭра ашҭаҿы. Апарад иара убасгьы иалахәхоит арратә техникеи авиациеи.
Аԥсны 2025 шықәсазы 320 млн мааҭ инареиҳаны ибжьаратәиуи имаҷуи абизнес адгылара иазоужьын. Урҭ рҟынтәи 126 млн урыстәылатәи финанстә цхыраароуп ҳәа рҳәоит Аминистрцәа реилазаара адыррақәа. Адгылара роуит 265 субиект, шықәсык аԥхьа иҟаз аасҭа уи 89 рыла еиҳауп. Аԥарақәа рӷьырак Очамчыра араион аҿтәи апроектқәа ирзоужьуп – 75,6 млн мааҭ. Зегь раасҭа имаҷны аԥара Гал араион иақәхарџьхеит – 6,2 млн. 2024 шықәса иаҿырԥшны аҳәынҭдгылара 261% ихалеит.
Аԥсуа напҟазацәа рнапкымҭақәа рцәыргақәҵа-ҭира аатит Аҟәа Багаԥшь ихьӡ зху ашҭаҿы.Раалыҵ ӡырыргеит ацәаҟаҵаҩцәа, абџьарҟаҵаҩцәа, апарфиумерцәа уҳәа аҟазацәа аӡәырҩы. Иара абраҟагьы иааухәар улшоит амилаҭтә чысқәеи аҳамҭаҷқәеи. Ацәыргақәҵатә ҵакыра аартызаауеит жьҭаара 1 аҟынӡа. Акультура аминистр Даур Ақаҩба иажәақәа рыла, ари аԥышәа ҳаԥхьаҟа атуристцәа бзиа еицырбо егьырҭ ақалақьқәа рҿгьы аларҵәара ргәы иҭоуп.
240 рҟынӡа аусмҩаԥгатә мҩаԥысит Пицундатәи афестиваль "Вдох" аҳәаақәа ирҭагӡаны. Иара ԥшьымш имҩаԥысуан, уи рхы аладырхәит 8-тәылак рҟынтәи 1500-ҩык. Дара ирҭааит алекциақәа, аҟазаратә-классқәа, ацәыргақәҵақәа, аконцертқәа. Афестиваль ахыркәшаратә мшы азы имҩаԥысит 40-усмҩаԥгатә, Строганов ихьӡ зху Москватәи асахьаркыра-ааглыхратә академиа астудентцәа русумҭақәа раукционгьы уахь иналаҵаны. Аукцион аҿы ирымҭиз асахьақәа акурорт "Пицунда" ҳамҭас иарҭеит.