АҞӘА, нанҳәа 25, Sputnik, Анжелика Бениаԥҳа. Акультура-гәыҳалалратә фонд «Ашанеи» жәларбжьаратәи афонд «Аԥсни» афонд «Ашана» акциа "Ҳнапқәа еибаркны" аҳәаақәа ирҭагӡаны аиқәшаҳаҭра рнапы аҵарҩит аҩаша, нанҳәа 25 рзы.
Аиқәшаҳаҭра аҳәаақәа ирҭагӡаны, "Афонд Аԥсны" хыдҵаны иагоит ес-кварталцыԥхьаӡа ДЦП адиагноз ззықәгыло хәыҷ чымазаҩык ихәышәтәразы аматериалтә цхыраара аҟаҵара (иааизакны 800 000 мааҭ шықәсык азы).
Агәыҳалалратә фонд "Ашана" адиректор Джевеира Колосова иҳалҳәеит апартниорразы аиқәшаҳаҭра "Афонд Ашана" акциа "Ҳнапқәа еибаркны" аҳәаақәа ирҭагӡаны анапы шаҵаҩу.
"Даара краҵанакуеит агәыҳалалратә фондқәеи акоммерциатә еиҿкаарақәеи ҳацхраара иахьазыхио. Иахьазы ДЦП адиагноз ззықәгыло ахәыҷқәа 40-ҩык ыҟоуп. Бжьаратәла ас иҟоу хәыҷык ихәышәтәра шықәсык ахь иартәоит 400 000 мааҭ. 40-ҩык рзы иаҭахуп 16 миллион мааҭ. Ари ҳара ҳамацара ҳамч ақәхо иҟам. Убри азы апроблема аӡбразы ҳара иҳавагылеит жәларбжьаратәи "Афонд Аԥсны" ҳәа азгәалҭеит Колосова.
"Афонд Аԥсны" ахантәаҩы Сонер Гогәуа ахҭыс ахә ҳаракны ишьеит.
"Афонд Ашана" аус дуӡӡа мҩаԥнагоит. Ҳаргьы иаҳҭаххеит ари апроцесс ахалархәра. Ҳнапы зҵааҩыз аиқәшаҳаҭра лагамҭоуп. Ахәыҷқәа ҳара уаҵәтәи ҳԥеиԥш роуп. Урҭ ргәабзиаразы иҳалшо зегь ҟаҳҵалоит", — иҳәеит Гогәуа.
Агәыҳалалратә фонд "Ашана" адиректор Джевеира Колосова асеиԥш иҟоу ахәыҷқәа ррыцҳара рыцеиҩызшарц зҭаху рахь ааԥхьара ҟалҵеит излалшо ала ацхыраара роуларц.
"ДЦП иахьа Аԥсны ипроблеманы иҟоуп. Аҳәынҭқарра иаанартит аиҭашьақәыргыларатә центр усеиԥш иҟоу рзы. Ҳареи афонд "Аԥсни" ахәыҷқәа аоперациақәа рахь рышьҭра ҳацхраалоит. Аха еиҿкаарак иазалыршом апроблема аӡбра, зегь рыхәышәтәра. Итәыму арыцҳара ыҟаӡам. Арыцҳара зегьы еицырзеиԥшуп. Аиааирагьы ҳалшоит ҳаидгыланы мацара", — азгәалҭеит Колосова.
"Афонд Аԥсны" афонд "Ашана" иазынанашьҭхьеит 200 000 мааҭ Лиана Доӷәызиа лыхәышәтәразы.
