Атехникатә хылаԥшра аҟәатәи алифтқәа аанкылатәуп ҳәа иаԥхьаӡоит

© Sputnik / Александр Кряжев / Амедиаҵәахырҭахь аиасраАлифт аиҭашьақәыргылара. Архивтә фото.
Алифт аиҭашьақәыргылара. Архивтә фото. - Sputnik Аҧсны
Анапаҵаҩра
Аҟәа ақалақь Ахадара анхарҭатә усбарҭа аиҳабы ихаҭыԥуаҩ Емма Хәарцкьиаԥҳа аҳҭнықалақь алифтқәа рҭагылазаашьа ҳзеиҭалҳәеит.

АҞӘА, ажьырныҳәа 18 — Sputnik, Бадраҟ Аҩӡба. Аҟәа ақалақь Ахадара анхарҭатә усбарҭа аиҳабы ихаҭыԥуаҩ Емма Хәарцкьиаԥҳа аҳҭнықалақь алифтқәа рҭагылазаашьа ҳзеиҭалҳәеит. Урҭ рыбжак атехника аганахьала иажәит, лҳәеит лара.

"Ҳтехникатә хылаԥшцәа иазгәарҭоит алифтқәа ажәны ишыҟоу. Урҭ русура шаанкылатәу. Аха уи ҳзалыршом, избанзар иҟоуп зықәра неихьоу, ичмазцәоу ауаа. Урҭ ахалара албаара рцәыуадаҩуп", — лҳәеит лара.

Хәарцкьиаԥҳа лажәақәа рыла Аҟәа иҟоу алифтқәа 430 рҟынтәи 36 роуп иԥсаху.

"2015 шықәса рзы 430 лифт рҟынтәи 205 лифт аус рур рылшоит ҳәа ишьақәҳаргылеит. Егьырҭ русура аанкылатәуп. Уи иахылаԥшуеит Зҭакԥхықәра ҳәаақәҵоу аилазаара "Аԥснылифт", ҳәа азгәалҭеит лара.

Лара ишылҳәаз ала алифт 25 шықәса рҟынӡа аус ауыр алшоит.

Хәарцкьиаԥҳа иазгәалҭеит ақалақь ауааԥсыра лассы-лассы алифтқәа рремонт аҟаҵаразы арзаҳалқәа шынарышьҭуа аусбарҭахь.

"Иахьа алифт аремонт ҟаҳҵаргьы мчыбжьык ашьҭахь ишаанымгыло агәра ааго иҟам", лҳәеит лара.

Лара лажәақәа рыла лифтк мызкы амаҵ аура 3 000 мааҭ артәоит.

ЗҲәА "Аԥснылифт" адиректор Ҭемыр Чкотуа иажәақәа рыла алифтқәа лассы-лассы иԥхасҭахоит.

Иара убасгьы иҳәеит алифтқәа рзы ахәҭақәа рыԥшаара акыр ишыуадаҩу.

"Ахәҭақәа раахәаразы Москва, Черқьесск уҳәа ақалақьқәа рахь ҳцоит", — иҳәеит Чкотуа.

Алифтқәа ркабинақәа рҟны икыдуп ЗҲәА "Аԥснылифт" аҭелқәа. Алифт бжьысыр урҭ рахь уасыр ҟалоит.

Ажәабжьқәа зегьы
0