Sputnik, Анжелика Бениаԥҳа.
Аконкурс ахԥатәи аҭыжьымҭаан ажиури алахәылацәа жәеизаҩык ирзыӡырыҩны быжьҩык алырхит. 13-шықәса зхыҵуаз Кристина Стародубова (Урал), 14-шықәса зхыҵуаз Дариа Ходакова (Манушкино, Ленинградтәи аобласт), 15-шықәса зхыҵуаз Дариа Задирака (Брянск), 15-шықәса зхыҵуаз Наталиа Вострикова (Удмуртиа) ирылымшеит ԥхьаҟатәи аетапқәа рахь аиасра.
Иуадаҩу, ихьанҭоу аԥсҭазаара змоу ахәыҷқәа асценахь ицәырҵны рылшарақәа аадырԥшуан. Ргәы иҵхоз, изызхьаауаз азыӡырыҩцәа рҟынӡа инаргон.
"Ишԥасҭаху схы набыдысҵарц сан, сабгьы сымаӡақәак иасҳәарц", ашәа иҳәон зани заби рдырра зқәашьымхаз, 16-шықәса ирҭагылоу аҷкәын Рома. Ашәа ("Помолимся за родителей") Рома ианынеигӡа ашьҭахь асценахь днеиуеит ашәа ициҳәарц Сосо Павлиашьвили.
"Аб ижәҩахыри ан лнапқәеи изыԥсахӡом аӡәгьы", ҳәа лашәа иалоуп 17-шықәса зхыҵуа Полина Барбовскаиа. Лара аа-шықәса данырҭагылаз деҭымхеит. Амҩатә машәыр иахҟьаны иҭахоит лани лаби. Лаҳәшьа хәыҷи лареи рыԥсы ҭаны еиқәхоит.
Полина амедицинатә колледж дҭоуп, ауаа реиқәырхара хықәкны илымоуп.
Аконкурс ажиури иалахәуп: Маргарита Суханкина, Иолка, Виктор Дробыш, Стас Пиеха.
Аԥсны ахьӡала апроект "Ты супер!" далахәуп Очамчыратәи ашкол-интернат ааӡамҭа Валериа Адлеиаԥҳа. Аконкурс "Ты супер!" изаамҭанытәиу аконцерт мҩаԥысит жәабран 25 асааҭ 20:00 рзы, аканал НТВ аҟны.
Апроект "Ты супер!" мҩаԥысуеит Урыстәыла Аҵареи аҵарадырреи рминистрра адгыларала. Апроект амҩаԥгаҩыс дҟалоит Вадим Такмениов. Ахәыҷтәы вокалтә еиндаҭлара "Ты супер!" мҩаԥысуеит ателеканал НТВ аҟны жәабран 11 инаркны. Апроект азы инарҭбаау аинформациа аиура алшоит НТВ асаит аҟны. Ашоу иазку ажәабжьқәа рдырра шәылшоит Sputnik Аԥсны аресурсқәа рҟны. Аинформациатә маҵзуреи арадио Sputnik хылаԥшра арҭоит аиндаҭлара амҩаԥысшьа. Иара иалахәуп 92-ҩык авокалистцәа: Урыстәыла, Аԥсны, Азербаиџьан, Ермантәыла, Беларуссиа, Қырҭтәыла, Ҟазахсҭан, Кыргызсҭан, Молдавиа, Украина, Естониа, Аахыҵ Уаԥстәыла рҟынтәи.
