"Бернарда Альба лыҩны" аԥсуа сценаҟны апремиера мҩаԥысит

© Sputnik / Илона ХварцкияАспектакль "Бернарда Альба лыҩны
Аспектакль Бернарда Альба лыҩны - Sputnik Аҧсны
Анапаҵаҩра
Аспектакль "Бернарда Альба лыҩны" (Федерико Гарсиа Лорка) апремиера мҩаԥысит Самсон Ҷанба ихьӡ зху Аԥсуа ҳәынҭқарратә драматә театр асценаҟны аҩаша, мшаԥымза 11 рзы.

Sputnik, Рада Ажьиԥҳа

"Бернарда Альба лыҩны" (арежиссиор Мадина Аргәынԥҳа) аусадулара мҩаԥысуан акыр мзы, имҩаԥган 35 репетициа. Апиеса ахаҵа идунеи ахьыҟам, аԥҳәыс илдунеиу пиесоуп. Аспектакль ароль хада налыгӡоит аҩны аԥшәма — Бернарда Альба.

Лхаҵа иԥсҭазаара даналҵ ашьҭахь Бернарда Альба илыӡбоит аа-шықәса ашәы ныҟәылгонаҵы лыҩнгьы адәахьынтә ԥша шәышәык ҩнамсроуп ҳәа. Лыԥҳацәа ҩыџьа хаҵак иахь ирызцәырҵыз абзиабара арыцҳарахь икылнагоит. Руаӡәк лҽыкнаҳаны лҽылшьуеит. Аха ан лзы абри арыцҳара аасҭа еиҳау лыԥҳа лыҽшылшьыз аӡәы иаҳар ҳәа дахьшәо ауп.

Аспектакль аҟынтә афотосахьақәа шәрыхәаԥшыр ҟалоит абра

"Аӡәы акы шәҿымшәан!" — илҳәо абри ауп зыԥҳа лҽылшьыз ан.

Адраматә театр асценаҟны иубо аиҳарак аиқәара аԥшшәоуп. Зны-зынла шкәакәақәакгьы налаԥсалоит ауп…

Ахәаԥшҩы Константин иазиԥхьаӡоит аспектакль аԥсуа уаажәларра рҭагылазаашьа бзианы иаанарԥшуеит ҳәа.

"Арежиссура акыр аинтерес аҵан еиҿкаауп. Мадина Аргәынԥҳа лоума, ахәмарыҩцәа роума – зегьы ҭабуп ҳәа раҳәара иаԥсоуп", — иҳәеит иара.

Аԥсны зҽаԥсазтәыз артистка Маиа Гьерзмааԥҳа агәра лгоит, дарбанызаалак ахәаԥшҩы гәҿыӷьрак имоуит ҳәа. Зегьы адинамикатә ҟазшьа рыманы имҩаԥысуан ҳәа азгәалҭоит лара.

"Сара сгәаанагарала аспектакль акыр иуадаҩуп, аха Мадина Аргәынԥҳа атема азнагашьа акыр дақәшәеит. Артистцәа рыхәмарра акәзар, зынӡаск жәа ахҳәаатәым", — лҳәоит Маиа Гьерзмааԥҳа.

Арежиссиор Мадина Аргәынԥҳа асоциалтә ҳаҿы лдаҟьаҟны аспектакль иалахәыз артистцәа рахь илымоу абзиабара ду далацәажәон.

© Sputnik / Илона ХварцкияСпектакль "Дом Бернарды Альбы"
Спектакль Дом Бернарды Альбы - Sputnik Аҧсны
Спектакль "Дом Бернарды Альбы"

"Артистцәа реиҳараҩык сара сабиԥара иаҵанакуеит, аха иҟоуп Изольда Арухаа, Тома Аҩӡыԥҳа, Ирина Коӷониаԥҳа. Урҭ рыхәмарра сара хәаԥшҩык иеиԥш акәын уаанӡа ишызбахьаз. Урҭ аус рыцызуртә еиԥш аҭагылазаашьа соуеит ҳәа схахьгьы исзаагомызт. Аха ҳусеицура иахьатәи апремиерахь ҳаанагеит", — лҳәоит Аргәынԥҳа.

Иагьазгәалҭоит апрактикаҟны арежиссиор ииҭахыҵәҟьоу еснагь ишзыҟамло.

Аспектакль иалахәуп: Изольда Арухаа, Ирина Коӷониаԥҳа, Циала Инаԥшьԥҳа, Кристина Цымцԥҳа, Гәында Ажьиԥҳа, Есма Кәыҵниаԥҳа, Ашьна Ҳагԥҳа, Хьыбла Мықәԥҳа.

Адекорациақәа аԥиҵеит асахьаҭыхыҩ Витали Қацәба.

Ажәабжьқәа зегьы
0