АФОН, 16 — Sputnik, Бадраҟ Аҩӡба. Ашьапылампалтә команда "Афон" ашьапылампыл азы Аԥсны ачемпионат актәи аикәшараҿ аԥыжәара агеит акоманда "Гагра" ианацыхәмаруаз. Ахәмарра хыркәшахеит 0:0 ҳәа.
Ахәмарцәа рылшарақәа зегьы иныҭкааны раарԥшра иаԥырхагахеит амшцәгьа. Аха ус шакәызгьы ахәмарра ахәаԥшразы ауаа рацәа неиит аҭыԥантәи акоманда адгылара аҭаразы.
Раԥхьатәи аминуҭқәа инадыркны "Афон" ашьапылампыласыҩцәа аԥыжәара рго иалагеит. Гаграа ракәзаргьы ишахәҭаз еиԥш аҭак аҟаҵара рылдыршон.
Актәи атаим абжара ианахыс ашьҭахь гаграа еиҳа-еиҳа афонаа рымбахьчаҩ ддыргәамҵуа иалагеит. Ампыл ҭаиршәыртә алшара зауз Едгар Гочуа импыл амба иацәхыкны ицеит.
Актәи атаим уахьгьы арахьгьы мпыл рызҭамыршәкәа еилгеит. Аҩбатәи атаимгьы алагеит еиҿагыларыла. Уажәы алшара бзиа зауз афонаа дырԥырхагахеит еицырдыруа Алексеи Бондаренко.
"Афон" азыҟаҵаҩ Армен Капикиан иазгәеиҭеит абри ахәмарра заҵәык аан шакәу афонаа ампыл ҭамыршәкәа иахьеилгаз.
"Ҳақалақь зегьы ҳадгылоит. Хәыҷи-дуи ҳахәаԥшуеит, аха асеиԥш амшцәгьаан ашьапылампыл ԥшӡа амҩаԥгара цәгьоуп", — иҳәеит Капикиан.
XXIV ашьапылампыл азы Аԥсны ачемпионат хацыркхеит хәажәкыра 20 2017 рзы. Иара иалахәуп акомандақәа: "Ерцахә", "Гагра", "Риҵа", "Спартак", "Самырзаҟан", "Афон", "Шахтиор", "Абазг", "Динамо", "Нарҭ".
