АҞӘА, рашәара 15 — Sputnik. Сроль хаҭала исзааигәоуп, избанзар актиор ироль ауп инасыгӡо, абри атәы иҳәеит Sputnik арадиостудиаҟны аурыс драматә театр актиор, арежиссиор Џьамбул Жорданиа.
"Ҳахәаԥшцәа даара аинтерес рызцәырнагап, иргәаԥхап ҳәа агәыӷра ҳамоуп ари аспектакль. Ари аҩыза акомедиа сара сахаанӡам. Издыруада, ҳара ҳаԥхьа аӡәыр иҟаиҵахьазар. Ари аспектакль еиҳарак ҷыдарас иамоу, иара америкатә пиесоуп, ҳтеатрқәа рыҟны акомедиақәа ықәҳаргылахьеит, аха америкатә комедиа иара ахатә ҷыдарақәа амоуп. Уи менталитетла, рхәыцрақәа аҽакала иҟоуп, уаҟа аԥара арҳаразы ауаа ирымхәыцуа, ирыдрымгало ҳәа иҟами", — иҳәеит Жорданиа.
Актиор иажәақәа рыла, урҭ рхымҩаԥгашьа аԥсуаа архәыцратә иҟоуп.
"Уаҟа иҟоуп ус еиԥш аҭагылазаашьақәа ауаҩы дызқәымгыӷуа, иахьыубо ихәыцра, иара уи дшаиааиуа. Ак аҵкьыс ак еицәаны аҭагылазаашьақәа дрықәшәоит, урҭ риаиразы абзиабара ада акгьы шимыхәо ибоит", — ҳәа азгәеиҭеит иара.
Аспектакль "Примадонны" аҟны жә-ҩык актиорцәа хәмаруеит, иаанарԥшуеит ҭаацәарак аҩнуҵҟа иҟалаз ахҭыс. Аурыс драматә театр аҟны акомедиа ықәиргылоит Урыстәылатәи арежиссиор Сергеи Ефремов. Арольқәа назыгӡо актиорцәа еихыишеит аурыс драматә театр адиректор Иракли Хынҭәба.
Џьамбул Жорданиа Sputnik иеиҭаз арадиоинтервиу шәазыӡырҩыр ҟалоит абра
"Арежиссиор Сергеи Ефремов ибзиаӡаны иидыруеит акәама-ҵамарақәеи, азнеишьақәеи. Ҳара иқәҳаргыларгьы ҟалон, аха аамҭа ҳҭахын, уажәы иареи ҳареи ҳдыррақәа еилаҵаны иҟаҳҵо еиҳа алҵшәа аиуеит", — дақәгәыӷоит актиор.
Аспектакль "Примадонны" апремиера мҩаԥысран иҟоуп рашәара 15, 16, 23 рзы, Фазиль Искандер ихьӡ зху аурыс драматә театр асценаҟны.
