АҞӘА, рашәара 30– Sputnik, Бадраҟ Аҩӡба. Аԥсны иҟоу Урыстәыла Афедералтә шәарҭадаратә маҵзура аҳәаахьшьцәа аамҭа-аамҭала аҳәаа аилагара аԥдырҟәҟәаауеит ҳәа Sputnik акорреспондент изеиҭеиҳәеит Адәныҟатәи аусқәа рминистр ицхырааҩ Гьаргь Думаа.
"Аинцидентқәа раԥырҟәҟәаарази хырыҩ рыҭарази Амеханизм амшхәаԥштә азҵаараҟны иқәыргылан аҳәынҭқарратә ҳәааҟны еиуеиԥшым ахҭысқәа рызҵаара. Арҭ ахҭысқәа реиҳарак аҳәынҭқарратә ҳәаа аграждантә уааԥсыра иахьеиларго ауп изыдҳәало", — иҳәеит Думаа.
Аҳәаа аилагаҩцәа Аԥсны амчрақәа ирыҭахоит. "Аҭыԥ аҟны Аԥсны азакәанқәа инарықәыршәаны аӡбрақәа рыдыркылоит" ҳәа азгәеиҭоит аминистр ицхырааҩ.
Излацәажәоз азҵаарақәа ируакын аби аԥеи Рогаа аҳәынҭқарратә ҳәаа ахьеиларгази урҭ раанкылараан аҿагылара иҟарҵази.
"Дара Гал, Ҵаҟатәи азона ҳәа иахьашьҭо аҳәаа иахысит. Урыстәылатәи аҳәаахьшьцәа ианааныркыла, аҿагылара ҟарҵеит, аҳәаахьшьцәа аахақәа рырҭеит. Абри аус аганахь ала ихацыркуп ашьаус. Апрокуратура аус аӡбарҭахь инанашьҭит", — иҳәоит Думаа.
Иара иазгәеиҭеит Қырҭтәыла аҳәаа ҳәынҭқарратә ҳәаан ишамԥхьаӡо, уи иахҟьаны апроблемақәа шцәырҵуа.
"Қырҭтәылатәи агани ООН, ОБЕСЕ реиԥш иҟоу жәларбжьаратәи аиҿкаарақәеи аҳәынҭқарратә ҳәаа Қырҭтәылеи Аԥсни реиҟәшарҭа цәаҳәа акәны иршьоит", — иҳәоит адипломат.
Аԥсны аҳәынҭқарратә ҳәаа аилагара ахәшьара анаҭоит Аԥсны азакәанԥҵарала ҳәа азгәеиҭоит Думаа.
"Лассы-лассы ицәырыргоит аҳәааҿ аушьҭырҭатә ҭыԥқәа ҩба раркра азҵаара. Иара убри аангьы атермин "аҳәынҭқарратә ҳәаа", ахархәара арҭом".
Аԥсны алалара азин ыҟоуп ишьақәыргылоу аԥҟаррақәа рыла. Уи Адәныҟатәи аусқәа аминистррахь авиза аиуразы азыҳәа аҟаҵароуп. Авиза змоу ауаҩԥсы Аԥсны аҵакыра иалалара ԥынгыла амам ҳәа ишьоит адипломат.
Ақырҭуа ган акәзар еснагь еиԥш ишьҭнахит лаҵарамза 19 2016 гшықәса рзы ақырҭуа-аԥсуа ҳәааҟны аҭыԥ змаз, Қырҭтәыла атәылауаҩ Гигла Отхозориа ишьра.
"Ари азҵаара еилатәара-цыԥхьаӡа ицәырыргоит. Аха ақырҭуа ган иаҳнаҭаз адокументқәа ашаҳаҭ шьаҭа узрыҭом, избанзар урҭ ишахәҭоу еиԥш еиҿкаам, иара убасгьы Апрокуратура аорганқәа рахь аофициалтә зыҳәа ҟаҵам", — иҳәоит Думаа.
Аинцидентқәа раԥырҟәҟәаареи хырыҩ рыҭареи рзы Амеханизм аҳәаақәа ирҭагӡаны имҩаԥысыз аиԥылара иалахәын: Аԥсны Ашәарҭадаратә маҵзура Галтәи араионтә ҟәша аиҳабы Ҭимур Шергелиа, Аԥсны Ашәарҭадаратә маҵзура ацентртә аппарат аҟәша аиҳабы ихаҭыԥуаҩ Асҭамур Колбаиа, Адәныҟатәи аусқәа рминистр ицхырааҩ Гьаргь Думаа.
Аганқәа изаамҭанытәиу аилатәара ԥхынгәы 26 2017 шықәса рзы имҩаԥыргарц еиқәышыҳаҭхеит.
