Альбина Жьиԥҳа, Sputnik
Дарбанзаалак аспортсмен изы Аолимпиатә хәмаррақәа акыр зҵазкуа хҭысуп, иҳәеит Аԥснытәи аолимпиатә комитет ахада Валери Аршба. Жәларбжьаратәи аолимпиатә комитет иаднакылаз ақәҵара угәы узырхьша жәабжьуп, иазагәаиҭеит иара.
"Аспорт аҵкыс аполитика иаҳа еиҳахеит. Адопинг идикылеит ҳәа зны спортсменк ихьӡ рҳәап, нас даҽаӡәы. Ари аҳәынҭқарра азы акум, аспортсменцәа рхаҭа рзы ргәы дзырхьша жәабжьуп", — иҳәеит Аԥснытәи аолимпиатә комитет ахада.
Жәларбжьаратәи аолипиатә комитет иҟанаҵаз аҳәамҭа ашьҭахь, урыстәылатәи акоманда азин рымоуп аолимпиатә бираҟ иаҵагылан ақәгылара, аӡәырҩы Урыстәыла Алада Кореиҟа зынӡа имцарц аҳәамҭақәа ҟарҵеит. Валери Аршба игәаанагарала аспортсменцәа хымԥада аолимпиадахь ицароуп.
"Зегь дара роуп аспортсменцәа Урыстәыла иатәылауаауп. Ҳәарада, угәы унархьуеит агимн, иара егьырҭ аҳәынҭқарра атрибутқәа ахьыҟамло, аха уи иамыхәаԥшкәа аолимпиадахь ицароуп", —иазгәаиҭеит иара.
Аԥснытәи аолимпиатә комитет аиҳабы иҳәоит Жәларбжьаратәи акомитет аӡбамҭа аполитика ишадҳәалоу.
"Урыстәыла иааигәахоит атәыла хада иалхрақәа, ари ахҭыс уи иадҳәалоуп ҳәа сгәы иаанагоит. Шьҭа Урыстәылатәи аспортсменцәа зегьынџьара шьапҿаршә рырҭалоит ", — иҳәеит Валери Аршба.
Егьырҭ атәылақәа ркомитетқәа ари ахҭыс иахьақәҿырымҭуа азы Валери Аршба иҳәеит.
"Анаҩс дара иахьзырхәыша ак рзырхәыцуеит, ма асанкциақәа рыдҟарҵалоит. Жәларбжьаратәи аолимпиатә комитет аҿы аполитика иаҳа иӷәӷәахеит, аполитикатә арена аҟны аасҭа", — иазгәаиҭеит иара.
Аԥснытәи акомитет ҳәынҭқаррак аҳасабала, Аолимпиатә хәмаррақәа рылахәхаразы азин аиурцаз, Жәларбжьаратәи акомитет ахь ашәҟәы ҳашьҭхьеит, аха макьана уи ҭакда иаанхоит.
